Түркия Республикасының президенті Режеп Тайып Ердоған жұма күні Түрікменстанда өткен халықаралық форумда Түркияның бейбітшілік пен диалогты ілгерілетуге берік екенін мәлімдеді.
Ашхабадта өткен Халықаралық бейбітшілік және қауіпсіздік форумында Ердоған Түркияның тарихы мен өркениеті жүктеген жауапкершілікпен бейбітшілік пен диалог орнату үшін бар күш-жігерімен жұмыс істеп жатқанын жеткізді.
Ердоған сондай-ақ Түркияның Ресей-Украина қақтығысына қатысты бастамаларды қоса алғанда бітімге қол жеткізу және тұрақты бейбітшілікті қамтамасыз етуге бағытталған дипломатиялық күш-жігерге қолдау көрсетуге дайын екенін мәлімдеді.
Президент Таяу Шығыс аймағына да тоқталып, бейбітшілікті орнықтыруға бағытталған барлық кезеңдерге палестиналықтардың қатысуы мен үлес қосуы қажет екенін баса айтты.
Президент Ердоған қазан айында Газада Израиль мен ХАМАС арасында қол жеткізілген бітімнің әлі де толық орындалмағанын еске салып, халықаралық қолдауды жалғастыруға шақырды.
Түрікменстанның тұрақты бейтараптығы
Түркия Республикасының президенті Режеп Тайып Ердоған Ашхабадта Түрікменстанның Бейтараптық монументіне гүл шоғын қою рәсіміне қатысты.
Ердоған бұл рәсімге Ресей Федерациясының президенті Владимир Путин және Иран Ислам Республикасының президенті Месуд Пезешкиянмен қатар бірнеше үкімет басшыларымен бірге қатысты. Ердоған ресми қарсы алу рәсімінен кейін ортақ фотоға түсті.
Көшбасшылар түстен кейін іс-шараның ашылу отырысына қатысады.
Ашхабадта өтіп жатқан форум Түрікменстанның тұрақты бейтараптық мәртебесінің 30 жылдығын және БҰҰ Бас Ассамблеясының 2025 жылды «Халықаралық бейбітшілік пен сенім жылы» деп жариялауын атап өту мақсатында ұйымдастырылып отыр.
