Қытайдың вице-президенті Хан Чжэн Қытай төрағасы Си Цзиньпин мен АҚШ президенті Дональд Трамптың Оңтүстік Кореяда өтуі жоспарланған кездесуі қарсаңында АҚШ-пен ынтымақтастық пен достық орнатуға шақырды.
Мемлекеттік «CGTN» телеарнасының хабарлауынша, Хан Чжэн екі елдің ортақ мүдделері мен ынтымақтастыққа қолайлы мүмкіндіктері бар екенін атап өтіп, «Осы негізде Қытай мен АҚШ серіктес әрі дос бола алады және солай болуы тиіс»,- деді.
Хан бұл пікірлерін АҚШ-тың Орегон штаты сенатының төрағасы Роб Вагнермен өткізген кездесуінде айтты. Ол сондай-ақ АҚШ-тың Қытаймен өзара құрмет, бірге бейбіт өмір және ортақ табысқа негізделген ынтымақтастық рухта жұмыс істеуін қалайтынын жеткізді. Хан Чжэн әлемнің ең ірі екі экономикасы Қытай мен АҚШ жаңа кезеңде өзара байланыстың дұрыс жолын бірге тауып, мұның екі елге де, бүкіл әлемге де пайда әкелетініне сенім білдірді.
Сонымен қатар ол Вагнер мен өзге де заң шығарушылардың екі тарап арасындағы байланыстар мен өзара іс-қимылды жалғастыруын, халықтар арасындағы қарым-қатынасты тереңдетіп, жергілікті деңгейде Қытай-АҚШ ынтымақтастығын дамытуда үлгі болуын қалайтынын айтты. Ал Роб Вагнер жергілікті деңгейдегі ынтымақтастықтың маңызын атап өтіп, Орегон штатының Қытаймен достық және іскерлік қатынастарды нығайтуға бағытталған заң жобасын қабылдағанын мәлімдеді.
