Түркия Солтүстік Кипр Түрік Республикасы Мәжілісінің сейсенбі күнгі Кипр мәселесіне қатысты екі мемлекет негізіндегі шешімін құптады.
Түркияның вице-президенті Жевдет Йылмаз түрік әлеуметтік желісі «Nsosyal» арқылы жасаған мәлімдемесінде былай деді: «Бұл шешім - Солтүстік Кипр түрік халқының өз егемендігін, ұлттық құндылықтарын және болашағын қорғауға деген берік ниетінің айқын көрінісі».
«Елу жылдан астам уақыт бойы нәтиже бермеген федерация моделі енді өз маңызын жоғалтты. Аралда шынайы, тұрақты және әділ шешім тек екі тең егемен мемлекет негізінде ғана мүмкін. Осы тарихи шешімді қабылдаған барлық депутаттарды құттықтаймыз және Кипр түрік халқының болашағы, тыныштығы мен абыройы жолында көрсеткен ұстанымдары үшін алғыс айтамыз. Біз Кипр түріктерінің шешім қабылдау және өз болашағын айқындау құқығына қолдау көрсетуді жалғастырамыз», - деді ол.
Солтүстік Кипр Түрік Республикасы бұл шешімді көпшілік дауыспен қабылдады.
Біріккен Ұлттар Ұйымының Кипр мәселесіне қатысты жан-жақты шешім табуға бағытталған талпыныстарына қарамастан, аралда грек және түрік қауымдары арасында келіспеушілік ондаған жыл бойы жалғасып келеді. 1960 жылдардың басында басталған аралдағы түріктерге қарсы этникалық шабуылдар Кипр түріктерін белгілі аймақтарға шоғырлануға мәжбүр етті.
1974 жылы Кипр гректері Грекияның аралды аннексиялау жоспарын қолдау мақсатында төңкеріс ұйымдастырды. Түркия кепіл ел ретінде Кипр түріктерін қудалау мен зорлық-зомбылықтан қорғау үшін аралда әскери операция жүргізді. Осы оқиғалардың нәтижесінде 1983 жылы Солтүстік Кипр Түрік Республикасы құрылды.
Түркия, Грекия және Ұлыбритания сияқты кепіл елдердің қолдауымен 2017 жылы Швейцарияда басталған бірақ сәтсіз аяқталған келіссөздермен қатар аралдағы бейбіт процесті қайта жандандыру үшін түрлі бастамалар жасалды.
Оңтүстік Кипр грек әкімшілігі 2004 жылы Еуропалық Одаққа мүше болды. Сол жылы олар БҰҰ ұсынған және ұзақ жылдар бойы жалғасып келе жатқан дағдарысты шешуге бағытталған жоспарды қабылдамады.
