Израиль қоршаудағы Газаға бет алған халықаралық белсенділер бар кемені тоқтатуға дайын екенін хабарлады. Бұл бастама Израильдің жалғасып жатқан шабуылдары салдарынан ушыға түскен гуманитарлық дағдарыс аясында Газаға жасалған қоршауға қарсылық білдіруге арналған.
Әскери радио дүйсенбі күні Израиль әскери-теңіз күштері Сицилиядан шыққан Газа флотилиясы науқанының бір бөлігі саналатын “Madleen” атты желкенді кеменің келуіне дайындалып жатқанын хабарлады. Ақпаратқа сәйкес, 12 адамдық экипаж мінген кеме «теңіз қоршауын бұзуды» мақсат етеді.
Бұл миссияны ұйымдастырған “Freedom Flotilla” коалициясы жасаған мәлімдемеде “Madleen” кемесі «адам құқықтарын қорғаушыларды және гуманитарлық көмек алып бара жатқан азаматтық кемені» білдіретіні, сондай-ақ Израильдің «заңсыз әрі геноцид сипатындағы қоршауына тікелей қарсылық» болып саналатыны айтылды.
Жолаушылардың арасында Франция-Палестина текті Еуропарламент депутаты Рима Хассан сияқты әртүрлі елден келген еріктілер бар. Кеме Газа халқының азаматтық тұрғындары үшін аса қажетті cәбилерге арналған ұнтақ қоспалары, ұн, күріш, балалар жаялығы, әйелдерге арналған гигиеналық құралдар, су тазарту жиһаздары, медициналық жабдықтар, балдақ пен балаларға арналған протездер сияқты гуманитарлық жүкті тасымалдауда.
«Бұл —азаматтық бейбіт қарсылық әрекеті» деп атап көрсеткен коалиция «Madleen» кемесіндегі барлық ерікті мен экипаж мүшелері бейбіт қарсылық бойынша арнайы дайындықтан өткенін» мәлімдеді.
Кеменің шамамен бір апта ішінде Газа жағалауына жетуі жоспарланды, алайда Израиль күштері тарапынан тоқтатылу қаупі өте жоғары.
Бұл сапар коалицияның мамыр айының басында жасаған әрекетінің жалғасы саналады. Ол кезде “Vicdan” флотилия кемесі Израильдің пилотсыз ұшақтарының шабуылына ұшыраған болатын. Шабуыл салдарынан кемеде өрт шығып, корпусында тесік пайда болғаны хабарланған.
Ал Газа медиа кеңсесі Израильді Газа халқының 2,4 миллион тұрғынын жерінен ығыстыру үшін аштықты қару ретінде пайдаланып отыр деп айыптады. Кеңсенің мәлімдеуінше, Израиль 2 наурыздан бері барлық шекара өткелдерін жауып, әсіресе азық-түлік көмегін өткізуге тосқауыл қойған.
