Мұнай-газ құбырлары акционерлік қоғамы (BOTAŞ) мен Әзербайжан Мемлекеттік мұнай компаниясы (SOCAR), «TotalEnergies» және Абу-Даби Ұлттық мұнай компаниясы (ADNOC) 2029 жылдан бастап 15 жыл бойы Әзербайжаннан Түркияға жалпы көлемі 33 миллиард текше метр табиғи газ жеткізуді көздейтін келісімшартқа қол қойды.
Түркия Республикасы Энергетика және табиғи ресурстар министрлігінің мәлімдемесіне сәйкес, Түркия мен Әзербайжан арасындағы энергия саласындағы берік қарым-қатынас Баку энергетика апталығында жаңа деңгейге көтерілді.
Баку энергетикалық форумы аясында бекітілген табиғи газды жеткізу келісіміне сәйкес, «Абшерон» кен орнындағы жаңа өндірістік инвестициялар шеңберінде 2029 жылдан бастап Түркияға жалпы көлемі 33 миллиард текше метр табиғи газ жеткізілмек.
Түркияның энергетика саласындағы орталық елге айналу мақсатын қолдайтын бұл қадам елдің, сондай-ақ аймақ пен Еуропаның энергиямен жабдықтау қауіпсіздігіне үлес қосады деп көзделіп отыр.
Энергетика және табиғи ресурстар министрі Алпарслан Байрактар қаңтар айының басында Әзербайжанмен жалпы көлемі 33 миллиард текше метрді құрайтын жаңа табиғи газ жеткізу келісімі жасалғанын жариялап, «Әзербайжандағы Абшерон кен орнынан жыл сайын 2,25 миллиард текше метрден, 15 жыл бойы жалпы есеппен 33 миллиард текше метрлік газ алу туралы келісім», — деген тұжырымды тілге тиек еткен еді.
