Чилидің бұрынғы мемлекет басшысы Мишель Бачелет сегіз кандидат арасында өткен бейресми дауыс беруде соңғының алдындағы орында қалып қойғаннан кейін Біріккен Ұлттар Ұйымының Бас хатшылығы кандидаттығынан бас тартқанын хабарлады.
Чилидің тұңғыш әйел мемлекет басшысы Бачелет сенбі күні әлеуметтік желіде жариялаған бейнежазбасында: «Бүгін БҰҰ Бас хатшылығы кандидаттығынан бас тарту туралы шешім қабылдағанымды мәлімдедім», — деді.
Бачелет: «Кейбіреулер менің кандидаттығым үшін дұрыс уақыт емес деп ойлауы мүмкін. Бұған қарамастан осындай үлкен күреске түскенім үшін өкінбеймін», — деді.
Келесі БҰҰ Бас хатшысын анықтауға бағытталған бейресми процесс шеңберінде осы уақытқа дейін үш дауыс беру өтті. 15 мүшесі бар БҰҰ Қауіпсіздік Кеңесі Коста-Риканың бұрынғы вице-президенті Ребека Гринспанды екі дауыс беруде бірінші орынға шығарды.
Ал Гайананың бұрынғы сыртқы істер министрі Каролин Родригес-Биркетт үшінші дауыс беруде бірінші орынға ие болды.
Қолдаудан айырылды
Бачелеттің кандидаттығы өткен ақпан айында жарияланған еді, сондай-ақ Мексика мен Бразилияның солшыл бағыттағы көшбасшылары да оған қолдау білдірген болатын.
Дегенмен 74 жастағы Бачелеттің кандидаттығы Чилидің жаңа президенті, оңшыл радикалы Хосе Антонио Каст қолдауын қайтарып алғаннан кейін бәсекелестік қарқынын жоғалтты.
Әрдайым қолданылмаса да, қалыптасқан дәстүр бойынша БҰҰ Бас хатшылығы географиялық аймақтар арасында кезекпен ауысып отырады. Бұл жолы кезектің Латын Америкасында екені айтылуда.
Бачелеттің кандидаттықтан бас тартуымен, БҰҰ-ның қазіргі Бас хатшысы, 77 жастағы португалиялық Антониу Гутерриштің орнына келу үшін жарысып жатқан кандидаттардың саны төрт әйел мен үш еркекті қосқанда жеті болып тұр. Гутерриштің екінші бесжылдық өкілеттік мерзімі 31 желтоқсанда аяқталады.
