БҰҰ Бас хатшысы Антониу Гутерриш Гвинея-Бисауда осы аптада әскердің билікті басып алып, Батыс Африка елінің президентін қызметтен тайдыруына байланысты “терең алаңдаушылық” білдіріп, бейсенбі күнгі мәлімдемесінде конституциялық құрылымды “дереу әрі шартсыз” қалпына келтіруді талап етті.
Гвинея-Бисау армия өкілдері Умару Сиссоку Эмбалоны қызметінен алып, елдің құрлық, теңіз және әуе шекараларын жапты. Әскер бұл әрекетті биліктің елді “тұрақсыздандыруға” бағытталған саясат жүргізіп отыр деген белгілерге сүйене отырып жасағанын мәлімдеді.
Өздерін “Ұлттық қауіпсіздік пен қоғамдық тәртіпті қалпына келтіру жөніндегі Жоғарғы әскери басшылық” деп таныстырған офицерлер тобы мемлекеттік телеарна арқылы таратылған хабарламада “мемлекеттік биліктің барлық тармағын өз қолдарына алғандарын” жариялады.
Әскер барлық медиа қызметін мен сайлау үдерісін тоқтатып, бүкіл шекараны жапты және жергілікті уақыт бойынша сағат 21:00-де басталатын тоғыз сағаттық коменданттық сағат енгізді.
Гвинея мен Сенегал арасында орналасқан Гвинея-Бисауда 1974 жылы Португалиядан тәуелсіздік алғаннан бері төрт төңкеріс болды. Елдегі сайлау нәтижелері жиі дауға себеп болып келеді.
