Елші Мехмет Гүллүоглу Газа аймағындағы гуманитарлық көмек жұмыстарын бақылау және тиісті мекемелер мен жергілікті билік органдарымен үйлестіруді қамтамасыз ету мақсатында Палестинаға гуманитарлық көмек координаторы болып тағайындалды.

Гүллүоглу Газаға қажетті гуманитарлық көмек пен ең қажетті заттарды анықтау үшін зерттеу жұмыстарын жүргізеді. Біріккен Ұлттар Ұйымының агенттіктерімен бірге жұмыс істеп, олардың аймақтағы қызметіне қолдау көрсетеді. Сонымен қатар ол аймақтағы түрік мекемелерімен бірге Түркиядан жіберілетін көмектің мұқтаж жандарға жеткізілуін қамтамасыз етеді.

Гүллүоглу Мысыр мен Иордания арқылы жіберілетін көмектерге қатысты жергілікті билік органдарымен кездесу өткізіп, науқастарды эвакуациялау шараларымен бірге Түркияның Газаның медицина саласына көрсетіп отырған қолдауын күшейтеді.

Түркияның Газадағы гуманитарлық көмектері

Түркия гуманитарлық көмек көрсету саласында мықты мемлекет. Қақтығыстар, табиғи апаттар мен жаппай көші-қон жиі болатын өңірде орналасқан Түркия Палестина мен Сирия сияқты көрші елдерге, сондай-ақ әлемнің өзге де аймақтарындағы мұқтаж жандарға, тілі мен дініне, нәсіл мен  жынысына қарамастан жедел көмек жеткізіп келеді.

Израиль шабуылдары басталғалы бері Түркия Газаға ең ірі гуманитарлық көмек жеткізуші елдердің бірі. Осы аяда Түркия 2023 жылдың қазан айынан бері теңіз және әуе жолдары арқылы Газаға 102 мың тонна гуманитарлық жүк жөнелтті.

Газада орнаған бітім тұрақты әрі жеткілікті деңгейде гуманитарлық көмек жеткізуге мүмкіндік беруде. Осы көмектің жалғасы ретінде Түркия 2025 жылдың 14 қазанында Мерсин портынан Мысырдағы әл-Ариш портына шамамен 865 тонна гуманитарлық жүк тиелген кеме жіберді.