Канада Палестина билігі маңызды реформаларды жүзеге асырған жағдайда, 2025 жылдың қыркүйегінде Біріккен Ұлттар Ұйымы Бас Ассамблеясының 80-сессиясында Палестина мемлекетін мойындайтынын мәлімдеді және екі мемлекетті шешім мүмкіндігінің жойылып жатқанын ескертті.
Канада премьер-министрі Марк Карни мәлімдемесінде: «Канада тәуелсіз Палестина Израильмен бейбіт, іргелес өмір сүретін екі мемлекетті шешімді жақтап келеді. Ондаған жыл бойы бұл нәтижеге Израиль үкіметі мен Палестина билігі арасындағы келіссөздер негізінде жасалған бітімгершілік арқылы қол жеткізіледі деп күтілді. Өкінішке қарай бұл тәсіл қазір тұрақсыз», - деді.
Карни бейбітшілік үдерісіне нұқсан келтіретін бірнеше оқиғаға, соның ішінде оккупацияланған Батыс Шерия мен Шығыс Иерусалимде Израиль елді мекендерінің жылдам кеңеюіне, Израиль парламентінің басып алынған Батыс Шериядағы кейбір аймақтарды аннексиялау әрекетіне, Газадағы гуманитарлық дағдарыстың тереңдеуіне және гуманитарлық көмек шектеулеріне назар аударды.
Карни: «Бейбіт тұрғындардың азабы халықаралық деңгейде ұйымдастырылған әрекетті кешеуілдетуге жол бермейді», – деді.
Палестинаны тану реформаларға байланысты
Канаданың Палестинаны мойындауы Палестина билігінің басқару реформаларына байланысты болады.
Бұл реформаларға президент Махмуд Аббастың 2026 жылы ХАМАС-сыз жалпы сайлау өткізу және болашақ Палестина мемлекетінің қарусыздануын қамтамасыз ету міндеттемесі кіреді.
Сонымен қатар Карни 7 қазанда ХАМАС тарапынан алынған тұтқындарды дереу босатуға, топты қарусыздандыруға және Палестинаны басқаруға араласпауға шақырды.
Карни «Канада әрқашан Израильдің Таяу Шығыста бейбіт және қауіпсіз тәуелсіз мемлекет болуын табанды түрде қолдайды. Израиль үшін тұрақты бейбітшілікке апарар жол – оның қауіпсіз және бейбіт өмір сүру құқығын мойындайтын, тәуелсіз Палестина мемлекеті», - деді.
Карни Канаданың халықаралық серіктестермен сенімді бейбітшілік жоспарын әзірлеу және Газаға ауқымды гуманитарлық көмектің жеткізілуін қамтамасыз ету үшін жұмыс істейтінін айтты.
«Канада барлық палестиналық пен израильдіктің қадір-қасиетін, қауіпсіздігі мен ұмтылыстарын құрметтейтін әділ және тұрақты бейбітшілік орнатуда сындарлы серіктес болады», - деп қосты ол.
