Қытай дүйсенбі күні Пәкістан мен Ауғанстан арасындағы атысты тоқтату келісімін табысты жүзеге асырудағы Түркия мен Катардың араағайындық рөлін жоғары бағалады. Қытай Сыртқы істер министрлігінің ресми өкілі Го Цзякун Бейжіңде журналистерге берген мәлімдемесінде: «Пәкістан мен Ауғанстан — Қытайдың дәстүрлі әрі достық қарым-қатынастағы көршілері. Бұл екі мемлекет әрдайым көрші болып қала береді», - деп атап өтіп, Түркия мен Катардың араағайындық қызметіне тоқталды. Ол Қытайдың екі ел арасындағы атысты тоқтату келісімін құптайтынын және осы процеске үлес қосқан мемлекеттердің еңбегін жоғары бағалайтынын айтты.

Исламабад пен Кабул Катар мен Түркияның араағайындығымен Дохада өткен келіссөздер барысында жексенбі күні дереу атысты тоқтату туралы келісімге келген. Бұл шешім екі ел арасындағы өлімге әкелген шекаралық қақтығыстардан кейін қабылданды.

Келіссөздердің келесі егжей-тегжейлі кезеңі 25 қазанда Стамбулда өтетіні хабарланды.

Сондай-ақ Го Цзякун Қытайдың «бар ынтасымен» Пәкістан мен Ауғанстанның қайшылықтарын диалог арқылы шешіп, тұрақты бейбітшілікке қол жеткізіп, екі ел мен аймақтың тыныштығы мен тұрақтылығын қамтамасыз етуін қалайтынын айтты.
«Қытай екі елдің қалпына келуі мен дамуына жәрдемдесуде сындарлы рөл атқаруға дайын», - деді ол.