Иран Сыртқы істер министрі Аббас Аракчи ядролық келіссөздердің қайта басталуы АҚШ-тың Тегеранға қарсы әскери шабуыл жасамайтынына нақты кепілдік беруіне байланысты екенін айтты.
«Мен келіссөздер дереу басталады деп күтпеймін», - деді Аракчи сейсенбі күні «CBS News»-ке берген сұхбатында.
«Келіссөздер қайта басталмас бұрын АҚШ-тың келіссөздер жүріп жатқан кезде бізге әскери шабуыл жасамайтынына кепілдік қажет. Барлық факторларды ескерсек, бізге көбірек уақыт керек», – деп қосты ол.
Бұл мәлімдемелер өңірге ауқымды соғыс қаупін төндірген 12 күндік қақтығыстан кейінгі дипломатиялық байланыстар барысында жасалды.
Дүйсенбі күні Ақ Үй АҚШ президенті Дональд Трамптың Таяу Шығыс бойынша арнайы өкілі Стив Уиткофф пен Иран шенеуніктері арасындағы келіссөздерді растап, шиеленісті азайтуға сақтық танытқанын білдірді.
«Ұлттық мақтаныш пен даңқ мәселесі»
Аракчи Иранның ядролық бағдарламасына қатысты берік ұстанымын қайталап, «Бұл ұлттық мақтаныш пен даңқ мәселесі және Тегеран одан оңайлықпен бас тартпайды»,- деді. Ол сондай-ақ Иранның соңғы қақтығыстар кезінде өзін қорғау қабілетін дәлелдегенін баса айтты.
«12 күндік соғыста біз өз егемендігімізді қорғай алатынымызды дәлелдедік. Егер шабуылдар қайта басталса, біз батыл жауап береміз»,- деді Аракчи.
Қақтығыс 13 маусымда Израильдің Ирандағы әскери, ядролық және азаматтық нысандарға шабуылдауымен басталған болатын. Иран Денсаулық сақтау министрлігінің мәліметіне қарағанда шабуылдарда кем дегенде 935 адам қаза тауып, 5300-ден астамы жараланған.
Бұған қарымта шабуыл ретінде Иран Израиль нысандарына зымыран және ұшқышсыз ұшақтармен шабуыл жасады. Иерусалимдегі Еврей университеті таратқан мәліметтерге сәйкес, бұл шабуылдарда кемінде 29 адам қаза тауып, 3400-ден астам адам жарақат алды.
АҚШ Иранның Фордо, Натанз және Исфахандағы ядролық нысандарына әуеден соққы бергеннен кейін қақтығыс одан әрі ушығып, ауқымды аймақтық соғысқа ұласып кетуі мүмкін деген үрей тудырды.
24 маусымда АҚШ-тың араағайын болуымен атысты тоқтату келісімі күшіне еніп, қақтығыс уақытша тоқтатылды.
