Еуропалық Одақ Біріккен Ұлттар Ұйымының ядролық бағдарламасына байланысты Иранға қарсы санкцияларды қайта күшіне енгізуінен кейін осыған ұқсас шаралар қабылдайтынын хабарлады.

БҰҰ өткен демалыс күндері батыс елдерінің 2015 жылғы ядролық келісім аясында «санкцияларды қайта енгізу тетігін» іске қосуының нәтижесінде осындай қадам басты.

27 мүшелі блок қайта енгізген санкциялар Тегеранның ядролық және баллистикалық зымыран қызметіне қатысты операцияларды шектейтін БҰҰ шараларын қамтиды.

Сонымен қатар бұл санкциялар Иран Орталық банкінің активтерін бұғаттау секілді қаржылық шараларды да қамтитын кең ауқымды сипатқа ие.

Тегеран БҰҰ санкцияларының қайта күшіне енуін «әділетсіз» деп атап, бұл шешімді айыптады.

Батыс елдерінің көшбасшылары санкциялардың қайта енгізілуіне қарамастан диалог арналары ашық қалатынын ерекше атап өтті.

«Дипломатияның соңы емес»

Еуропалық Одақтың жоғарғы дипломаты Кая Каллас жексенбі күнгі мәлімдемесінде санкциялардың қайта енгізілуі «дипломатияның соңы болмауы тиіс» деді.

Иран ядролық қаруды көздемейтінін және Ядролық қаруды таратпау жөніндегі шартқа адал болып қала беретінін хабарлады.

Алайда Тегеран Лондон, Париж және Берлиндегі елшілерін кеңесуге шақырып, Батыс елдерін «ауыр салдар»  туралы ескертті.

Ресей мен Қытайдың санкцияларды қайта енгізуді кешіктіру мақсатында БҰҰ Қауіпсіздік кеңесінде жасаған бастымасы сәтсіз аяқталды. Бұл екі мемлекет аталған қадамның Таяу Шығыстағы шиеленісті күшейтуі мүмкін екенін хабарлады.

Қарар жобаларына Қауіпсіздік кеңесінің 15 мүшесінің тек төртеуі ғана дауыс берді.