«Financial Times» газеті  Иран Сыртқы істер министріне сілтеме жасап, «АҚШ өткен айдағы соғыс кезінде Иранға келтірілген шығындарды өтеуге келісуі керек», деп хабарлады.

Тегеранда «Financial Times»-қа берген сұхбатында «Олар бізге келіссөздің ортасында неге шабуыл жасағанын түсіндіруі керек және болашақ келіссөз барысында мұндай жағдай қайталанбайтынына кепілдік беруі тиіс», – деді Аббас Аракчи.

Басылымның мәліметінше, Аракчи мен АҚШ-тың арнайы өкілі Стив Уиткофф соғыс кезінде және одан кейін бір-бірімен хабар алмасқан. Иран өкілі америкалық әріптесіне ядролық бағдарламаға қатысты ұзаққа созылған дағдарысты аяқтау үшін «екі жаққа да тиімді шешім» табу қажеттігін баса айтқан.

«Иранның бас ядролық келіссөз жүргізушісі бұл шешімнің қаржылық өтемақыны қамтуы тиіс екенін, бірақ нақты мәлімет бермегенін және келіссөздер кезінде Иранға қайта шабуыл жасалмайтынына кепілдік қажет екенін атап өтті», деп хабарлады «Financial Times”

Өткен ай АҚШ Иранның ядролық нысандарына соққы жасаған болатын. Вашингтон бұл нысандар ядролық қару жасауға бағытталған бағдарламаға қатысы бар деп мәлімдеді.

Тегеран өз кезегінде ядролық бағдарламасының бейбіт мақсаттарға бағытталғанын және қару әзірлеумен айналыспайтынын алға тартты.

Ақ Үй мен АҚШ Мемлекеттік департаменті «Reuters» агенттігінің түсініктеме беру туралы өтінішіне жауап бермеді.