Түркияның Қорғаныс министрлігі YPG террор ұйымына қарсы Алеппода жүргізіліп жатқан операцияны толықтай Сирия армиясы жүзеге асырып жатқанын және жағдайдың жіті бақылауда екенін мәлімдеді.
Министрлік мәлімдемесінде «Сирияның қауіпсіздігі ˗ біздің қауіпсіздігіміз. Жағдай мұқият қадағалануда. Еліміз Сирияның бірлігі мен аумақтық тұтастығы үшін террор ұйымдарына қарсы күресті қолдайды. Сирия өтініш жасаған жағдайда Түркия қолдау көрсетеді», - делінген.
Сирия бұқаралық ақпарат құралдарының хабарлауынша, бұл лаңкестік ұйым бейсенбі күні Солтүстік Алепподағы тұрғын аудандарды үш күн қатарынан артиллериялық атқылауға алған.
Бейбіт тұрғындар тұратын аймақтарға шабуыл
Артиллериялық атқылаулар YPG тарапынан жасалған шабуылдардың ең соңғысы. Бұл шабуыл салдарынан кемінде алты адам қаза тауып, 39 адам жарақат алды.
Сирия билігінің дерегіне сәйкес, шабуыл салдарынан 3 мыңнан астам бейбіт тұрғын өз үйлерін тастап кетуге мәжбүр болды.
Қақтығыс салдарынан Алеппо әкімшілігі бейсенбі күні қаладағы мемлекеттік және жекеменшік мектептер мен университеттерде сабақтарды тоқтату мерзімін ұзартты.
2025 жылдың 10 наурызында Сирия үкіметі YPG-ні мемлекеттік құрылымдарға интеграциялауды көздейтін келісімге қол қойылғанын, елдің аумақтық тұтастығының қайта расталғанын және бөлінуге бағытталған әрекеттердің қабылданбайтынын хабарлаған болатын.
Сирия билігі сол уақыттан бері YPG-нің келісім шарттарды орындау үшін ешқандай нақты қадам баспағанын айтып келеді.
Сирия үкіметі 2024 жылдың 8 желтоқсанында Башар Асад режимі күйрегеннен кейін, ел аумағында қауіпсіздікті қамтамасыз ету үшін күш-жігерін арттырды.
