Президент Режеп Тайып Ердоған Аустрия канцлері Кристиан Штокермен кездесуіне қатысты: «Ең алдымен Кеден одағын жаңғырту және визасыз режим жөніндегі диалогты қоса алғанда Еуропалық одақтың (ЕО) жасайтын шаралары барлығымыздың мүддемізге сай келетінін жеткіздім», – деді.
Президент Ердоған Президенттік кешенде Аустрия канцлері Штокерді қабылдағаннан кейін өткен бірлескен баспасөз мәслихатында сөз сөйледі.
Президент Ердоған Түркияға канцлер ретінде алғаш рет сапармен келген Штокерді Анкарада қарсы алғанына қуанышты екенін білдірді.
Тарихи әрі терең тамырлы қарым-қатынас орнаған екі ел арасындағы жоғары деңгейдегі сапарлардың тұрақты жалғасуын қалайтынын айтқан Ердоған «Аустрияда тұратын саны 400 мыңнан асатын түрік қауымы екі елдің ортақ құндылығы әрі байлығы болып қала беретіні сөзсіз. Осы орайда бүгінгі келіссөздерімізде де Аустриядағы түрік қауымының тыныштығы мен әл-ауқатына айрықша мән беретінімізді атап өттік», – деді.
Ердоған Штокермен екіжақты қарым-қатынастардың барлық қырын талқылағандарын, сондай-ақ Түркия мен Еуропалық одақ арасындағы қатынастар және өңірлік әрі жаһандық мәселелер жөнінде пікір алмасқанын айтты.
Екіжақты сауда көлемі
Аустриямен қарым-қатынаста соңғы уақытта қалыптасқан оң серпіннің экономикалық және сауда байланыстарында да байқалып отырғанына қанағаттанатынын білдірген Ердоған «Аустриямен жасыл энергетика, аса маңызды минералдар, жоғары технологиялар, көлік және қорғаныс өнеркәсібі салаларында ынтымақтастықты дамытуға зор әлеуетіміз бар. Әсіресе Орта дәлізді нығайтуға бағытталған стратегиялық ынтымақтастықты бірлесіп жүзеге асыра алатынымызға сенеміз», – деді.
Түркия – қауіпсіздік пен көші-қон мәселесінде шешуші ел
Аустрия канцлері Кристиан Штокер Түркияның қауіпсіздік пен көші-қон мәселелерінде Аустрия үшін де, Еуропалық одақ үшін де шешуші ел екенін айтты.
Штокер заңсыз көші-қон, адам саудасы және ұйымдасқан қылмыс секілді мәселелерде Аустрияның Түркиямен өте тығыз ынтымақтастық орнатқанын айтып, Түркияның 10 жылдан астам уақыт бойы сириялық босқындарды қабылдап келе жатқанын еске салды.
«Біз мұны өте маңызды, тіпті жоғары бағалауға лайық қадам деп санаймыз», – деген Штокер үшінші ел азаматтарын кері қайтару мәселесінде Түркиямен ынтымақтастықтың аса маңызды екенін атап өтті.
