Ресейдің Волга өңірінде. Украина шекарасынан шамамен 1300 км қашықтықта орналасқан Чувашиядағы бір электроника зауытында екі ұшқышсыз ұшу аппараты зауыт аумағына құлағаннан кейін өндіріс уақытша тоқтатылды.
Чувашия басшысы Олег Николаев дүйсенбі күні “Telegram” желісінде жасаған мәлімдемесінде үш жылдан бері жалғасып келе жатқан соғыс аясында Украина дронының Ресейге жасаған ең терең шабуылдарының бірі болған осы оқиғада адам шығыны тіркелмегенін айтты.
Алайда Николаев дрондар құлаған ВНИИР (Бүкілресейлік шығын өлшеу ғылыми-зерттеу институты) кәсіпорнында «қызметкерлердің қауіпсіздігін қамтамасыз ету мақсатында өндірісті уақытша тоқтату туралы шешім қабылданғанын» мәлімдеді.
Дрондардың қандай да бір залал келтіріп келтірмегені әзірге анық емес. Николаев тағы бір дронның аймақ астанасы Чебоксар маңындағы егістік алқаптарға құлағанын да хабарлады.
Мәскеудің соғыс әрекеттері
Украинаның қанша ұшқышсыз ұшу аппаратын ұшырғанын емес, тек қанша аппараттың жойылғанын хабарлаған Ресей Қорғаныс министрлігі “Telegram” арқылы жасаған мәлімдемесінде әскерилердің Чувашия үстінде екі дронды атып түсіргенін мәлімдеді. Ресейдің әуе шабуылына қарсы қорғаныс жүйелері бір түн ішінде ел аумағында барлығы 49 украин дронын жойғаны айтылды.
Ресми емес ресейлік және “Telegram” жаңалық арналары таратқан фото және видеоларға қарағанда, дрондар электрондық соғысқа қажетті құрамдастарды өндіретін ВНИИР зауытында өртке себеп болған.
Украина армиясы шабуылды растап, Ресейдің Чувашия аймағындағы бір электрон зауытын нысанаға алғанын хабарлады. Киев Ресей ішіндегі мұндай шабуылдардың Мәскеудің соғыс әрекеттері үшін маңызды инфрақұрылымды жоюды көздейтінін және олар Ресейдің Украинаға қарсы жалғасып жатқан шабуылдарына жауап ретінде жасалатынын жиі мәлімдейді.
АҚШ Қаржы министрлігінің веб-сайтына сәйкес, Чувашиядағы тәжірибелік өндіріс жүргізетін ВНИИР АҚШ-тың санкциялық тізіміне енгізілген.
Аймақ басшысы Александр Гусев “Telegram” желісіндегі хабарламасында Украина шекарасына жақын орналасқан Воронеж аймағына жасалған украин дроны шабуылы салдарынан бір табиғи газ құбырына зақым келгенін және 22 тұтынушыға газ жеткізу тоқтатылғанын айтты.
