Түркияның жетекші туристік аймақтарының бірі болып саналатын Каппадокия беделді “Michelin” нұсқаулығына еніп, елдің гастрономия саласындағы жаңа танылған аймағына айналды.
Түркияның Мәдениет және туризм министрі Мехмет Нури Ерсой бұл жаңалықты «мақтаныш сәті» деп сипаттап, Түркияның әлемдік гастрономиядағы маңыздылығының артып келе жатқанын атап өтті.
Ерсой әлеуметтік желіде жасаған мәлімдемесінде: «Мыңдаған жылдық мұрасын бүгінге жеткізген Орталық Анадолының жүрегіндегі Каппадокия Стамбул, Измир және Мугладан кейін 2026 “Michelin” нұсқаулығына енді. Бұл сүйінші хабар гастрономиялық туризмде Түркияның қол жеткізген биік деңгейін тағы бір мәрте паш етіп отыр,» - деді.
Мәдениет және туризм министрлігінің мәлімдемесіне сәйкес, “Michelin” нұсқаулықтарының халықаралық директоры Гвендал Пулленнек бұл өңірдің мәдениеті мен гастрономиялық алуан түрлілігі инспекторларға терең әсер қалдырғанын атап өтті.
Пулленнек: «Каппадокияның аспаздық дәстүрі өңірмен терең байланыста. Аспаздар негізінен жергілікті өнімдер мен ауыл шаруашылығы өнімдерін қолданады. Біз бұл аймақты таңдауға тағы бір себеп ұсынғымыз келеді: Каппадокияның қайталанбас гастрономиялық әлемін сезіну», - деді.
Орталық Анадолыда орналасқан және ЮНЕСКО-ның Бүкіләлемдік мұралар тізіміне енген тарихи өңір Каппадокия пері мұржалары, тастан ойылған үйлері мен шіркеулері, сондай-ақ әуе шарларымен танымал.
Каппадокия сонымен қатар тандырда пісірілген еттерімен, қыш құмырада дайындалатын кәуаптарымен, ашытылған дәмдері мен жергілікті тіскебасарларымен арқылы бай аспаздық мәдениетке ие.
