Солтүстік Корея 2024 жылдан бері Оңтүстік Кореямен шекара бойына шамамен 960 мың мина орнатқаны туралы ақпарат тарады.

«Йонхап» ақпарат агенттігінің Оңтүстік Корея парламентінің депутаттарына сілтеме жасап хабарлауынша, елдің әскери басшылығы бұл мәселе жөнінде Ұлттық ассамблеяға мәлімет берген.

Хабарда Солтүстік Кореяның 2024 жылдан бері шекарадағы қорғаныс бекіністерін күшейтіп жатқаны айтылған. Осы уақыт ішінде Пхеньян екі ел арасындағы шекара бойына шамамен 960 мың мина орнатқаны алға тартылды.

Хабарға сәйкес, Оңтүстік Корея әскері Солтүстік Корея сарбаздарының әскери шекара сызығы бойына тікенекті сымдар мен миналар орнату, сондай-ақ танкіге қарсы қорғаныс жүйелерін орналастыру жұмыстарын күшейткенін анықтаған.

Бұған қоса кейбір әскери сарапшылардың бағалауынша, екі елді бөліп тұрған қарусыздандырылған аймақта Оңтүстік Корея орнатқан миналарды қоса есептегенде, 2 миллионнан астам мина болуы мүмкін.