Түркия Республикасының Сыртқы істер министрлігі жаңа парламенттің Сирияда инклюзивті басқару қағидаты негізінде тұрақтылықты, қауіпсіздікті және әл-ауқатты қамтамасыз етуге бағытталған күш-жігерге маңызды үлес қосатынына сенім білдірді.
Түркия Сирия Халық мәжілісінің алғашқы отырысының өтуін құптайтынын мәлімдеп, мұны сириялық халықтың заңды құқықтарына сәйкес саяси үдерісті ілгерілету және халық егемендігін орнықтыру жолындағы маңызды қадам ретінде бағалады.
Сыртқы істер министрлігінің мәлімдемесінде: «Сирия қоғамының түрлі топтарын біріктіретін Халық мәжілісі елде инклюзивті басқару қағидаты негізінде тұрақтылықты, қауіпсіздікті және әл-ауқатты қамтамасыз етуге бағытталған күш-жігерге елеулі үлес қосады әрі елдің болашағын айқындайтын заң шығару қызметін жоғары деңгейде атқарады деп сенеміз», – делінген.
Министрлік сондай-ақ Сирия халқының елдің аумақтық тұтастығы мен бірлігі негізінде гүлденген болашақ құруға бағытталған күш-жігерін қолдауды жалғастыратынын атап өтті.
Парламенттің алғашқы отырысы
Бастапқыда жоспарланған мерзімнен бір апта кейін өткен жексенбідегі парламент отырысына министрлер кабинетінің кейбір мүшелері мен мемлекеттік қызметкерлер қатысты.
Депутаттар Сирия Президенті Ахмед әл-Шараның қатысуымен Конституцияға адалдық антын қабылдады. Сондай-ақ парламенттің басшылық құрамын сайлау жоспарланып отыр.
Алғашқы отырыс Ахмед әл-Шара президент тағайындайтын қосымша үштен бір бөлікті қоса алғанда, парламенттің барлық мүшелері бекітілген жарлыққа қол қойғаннан кейін бірнеше күн өткен соң өтті.
Жаңа парламент 210 депутаттан тұрады. Оның 140-ы Сирия провинцияларындағы сайлау органдары арқылы сайланған болса, қалған 70 мүшені елдің өтпелі сайлау жүйесіне сәйкес президент Ахмед әл-Шара тағайындады.
