Түркия Ішкі істер министрі Али Йерликая сейсенбі күні жасаған мәлімдемесінде ДАИШ лаңкестік ұйымына қарсы жүргізілген операция аясында ел бойынша барлығы 357 күдіктінің ұсталғанын айтты. Йерликаяның айтуынша, күдіктілер 21 аймақта бір мезгілде жүргізілген терроризмге қарсы операциялар барысында қолға түскен.
Министр операциялардың облыстық полиция басқармалары, бас прокуратуралар, полицияның терроризмге қарсы және барлау бөлімшелерінің үйлестіруімен жүргізілгенін атап өтіп, Түркияның терроризммен күресетінін мәлімдеді.
Стамбул қаласының Бас прокуратурасы сейсенбі күні қала бойынша 110 күдіктінің қамауға алынғанын хабарлады. Мәлімдемеде қамауға алынғандардың 41-і дүйсенбі күні Яловада болған қауіпсіздік күштерінің операциясы кезінде алты ДАИШ лаңкесінің көзін жойған оқиғаға қатысы бар екені және Стамбулда ұсталған күдіктілердің жаңа жыл мерекесі кезінде қалада ұқсас шабуылдар жоспарлағаны айтылды.
Анкара қаласының Бас прокуратурасы таратқан ақпаратта, араларында 11 шетел азаматы бар 17 ДАИШ күдіктісіне қатысты қамауға алу туралы ордер шығарылғаны хабарланды. Мәлімдемеде күдіктілерге террористік ұйымға мүше болу және қақтығыс аймақтарымен байланыста болу айыптары тағылғаны, ал Терроризммен күрес бюросы оларды ДАИШ-қа қатысты тергеулер барысында алынған цифрлық материалдарды талдау арқылы анықтағаны атап өтілді.
