Түркия Республикасы Президенті жанындағы Коммуникация басқармасының басшысы Бурханеттин Дуран президент Режеп Тайып Ердоғанның жұма күні Сауд Арабиясына бір күндік жұмыс сапарымен баратынын хабарлады.
Дуран “NSosyal” әлеуметтік желісіндегі парақшасында жасаған хабарламасында сапар барысында Ердоғанның Сауд Арабиясының тақ мұрагері, әрі премьер-министр Мұхаммед бин Салман бин Абдулазиз Әл Саудпен және Пәкістан премьер-министрі Шахбаз Шарифпен кездесуі жоспарланғанын білдірді.
Шариф те екіжақты ынтымақтастық пен аймақтық оқиғаларға бағытталған үш күндік сапармен Сауд Арабиясына барды.
Сауд Арабиясының ресми “SPA” ақпарат агенттігі Шарифті Джиддадағы “Кинг Абдулазиз” халықаралық әуежайында Мекке аймағы губернаторының орынбасары Сауд бин Мишаал бин Абдулазиздің қарсы алғанын хабарлады.
Пәкістан мемлекеттік ақпарат агенттігі “Associated Press of Pakistan” (APP) Шарифке Фельдмаршал әрі Құрлық әскерлерінің қолбасшысы Асим Мунир, премьер-министрдің орынбасары әрі Сыртқы істер министрі Исхак Дар және басқа да жоғары лауазымды шенеуніктердің серік болғанын хабарлады.
“APP” мәліметінше, Шарифтің Сауд Арабиясының тақ мұрагері Мұхаммед бин Салманмен екіжақты ынтымақтастықты нығайту жолдары мен аймақтық және халықаралық оқиғалар төңірегінде келіссөздер жүргізуі жоспарланған.
Сауд Арабиясы мен Пәкістан аймақтық шиеленістер кезінде қол қойылған өзара қорғаныс келісімі шеңберінде тығыз қорғаныс қарым-қатынастарын сақтап отыр.
Сапар Исламабадтың Вашингтон мен Тегеран арасындағы дәнекерлік күш-жігерін жалғастырып жатқан кезеңіне тұспа-тұс келеді.
Маусым айында Катар АҚШ пен Иран арасындағы дәнекерлікке Пәкістанмен бірге қосылды.
Бұл жағдай 18 маусымда өзара түсіністік меморандумына қол қоюға және түпкілікті келісім бағытында келіссөздерді бастауға мұрындық болды.
Келіссөздер кейіннен Ормуз бұғазындағы теңіз қауіпсіздігі мен кеме қатынасының бостандығына қатысты келіспеушіліктерге байланысты тоқтап қалған еді, дегенмен Иран, Оман және АҚШ шенеуніктері соңғы уақытта қалған мәселелерді шешуге бағытталған кездесулерін жалғастырды.
