Президент Режеп Тайып Ердоған Президенттік кешенде өткен Министрлер кабинетінің отырысынан кейін халыққа үндеу жасады. Ердоған әлем мен аймақтың қақтығыстар, саяси және экономикалық аумалы-төкпелі кезеңдер мен әлеуметтік шиеленістер құрдымында тұрған шағында Түркияның өз бағытынан таймай, нық қадаммен мақсатына қарай ілгерілеп келе жатқанын баса айтты.
«Аймағымыздағы әрбір дағдарыс Түркияның соңғы 23 жылда жүріп өткен үлкен жолын дәлелдей отырып, еліміздің «тұрақтылық аралы» мәртебесін одан әрі нығайта түсуде. Түркия бүгінде адамзат бағыт-бағдар іздеген кезеңде өз аймағының ең қуатты, ең тұрақты елі ретінде танылуда. Бүгінде өз аяғында нық тұра алатын, тіпті қиын сәтте достары мен бауырларына қолдау көрсететін Түркия бар».
Президенттік басқару жүйесінің артықшылықтары арқасында әлемді алаңдатқан соғыстардың жойқын әсерін ең төменгі деңгейде ұстай алғандарын атап өткен Ердоған, Түркия мен Еуропалық Одақ арасындағы қарым-қатынастарға да тоқталды.
«Еуропа стратегиялық соқырлықтан арылуы тиіс»
Ердоған Еуропалық Одақтың (ЕО) көптеген институттарында Түркияға қатысты «стратегиялық соқырлықтың» сақталып отырғанына өкініш білдірді. Ол мәселенің Анкараның қай жерде тұрғанында емес, Брюссельдің болашақ әлемде өзін қайдан көргісі келетінінде екенін айтты.
Президент Ердоған сөзін былай жалғастырды:
«Түркия толық мүше ретінде орын алмаған ЕО-ның жаһандық актер және тартылыс орталығы бола алмайтыны енді түсінікті болуы тиіс. Біз тек қажет болғанда ғана есігі қағылатын, басқа уақытта шеттетілетін ел емеспіз және ешқашан болмаймыз. ЕО Түркияның сындарлы ұстанымын бағалай білуі керек. Ұмытпау керек, Түркия да бұрынғы Түркия емес, әлем де бұрынғыдай тек Батыс мемлекеттерінің ықпал ету аймағына сығымдалған күйде емес».
«Еуропа жол айрығында»
Әлемнің көпполярлы жүйеге қарай қарқынды дамып келе жатқанын және Түркияның осы жаңа жүйенің негізгі полюстерінің бірі болуға ең күшті үміткер екенін айтқан Ердоған:
«Бүгін Еуропаның Түркияға деген мұқтаждығы Түркияның Еуропаға деген мұқтаждығынан көп. Ертең бұл қажеттілік бұдан да артады», — деді.
Ердоғанның айтуынша, Еуропа қазір жол айрығында тұр: не Түркияның өсіп келе жатқан қуатын өздерінің тығырықтан шығуы үшін мүмкіндік ретінде көреді, не шеттетуші риторикалардың Еуропаның болашағын қараңғылауына жол береді. Ол еуропалық саясаткерлерді тарихи соқыр сенімдерді тастап, Түркиямен шынайы және тең дәрежелі қарым-қатынас орнатуға шақырды.
