Ресейдің Орынбор облысындағы Орск мұнай өңдеу зауытына дронмен шабуыл жасалып,  кәсіпорын жұмысын толық тоқтатты.  Кәсіпорынның жөндеу жұмыстары 6 айға дейін созылуы мүмкін екені хабарланды.

Орынбор облысының губернаторы Евгений Солнцев жазбаша мәлімдемесінде 11 тамызда Орск мұнай өңдеу зауытына жасалған дрон шабуылына қатысты пікір білдірді.

Солнцев шабуыл салдарынан зауыттың аса маңызды инфрақұрылымына зақым келгенін және оны жөндеу мүмкін емес екенін айтып, «Зауыт жұмысын толықтай тоқтатты. Жанармай дағдарысына дайындалып жатырмыз. Сырттан жеткізілетін жанармайға сүйенуге тура келеді», – деді.

Ол зауыттағы жабдықтардың шетелден әкелінгенін атап өтіп, санкцияларға байланысты жөндеу жұмыстары 6 айға дейін созылуы мүмкін екенін мәлімдеді.

Солнцев өңірде жанармай жеткізу жүйесі қайта реттелгенін атап өтіп, Орынбордағы 287 жанармай құю бекетінің 80 пайызы жұмыс істеп тұрғанын және жанармай жеткізуде арнайы қызмет көліктеріне басымдық беріліп отырғанын айтты.

Украина 11 тамызда Орск қаласындағы мұнай өңдеу зауытына шабуыл жасаған болатын. Шабуыл салдарынан зардап шеккендер болмағаны хабарланды.  

Украинаның Ресей аумағындағы мұнай өңдеу зауыттарына жасаған шабуылдары салдарынан жанармай жеткізуде қиындықтар туындап, бензин мен дизель отынын экспорттау тоқтатылған болатын.