“Израильдің шабуылдары тек Катарды ғана емес, бейбітшілік орнатуға тырысатын кез келген елді нысанаға алады”, -деп мәлімдеді Катар премьер-министрі БҰҰ Қауіпсіздік Кеңесінде. Ол осы аптада Дохаға жасалған шабуылды Газа келіссөздерін бұзуға бағытталған ашық әрекет деп айыптады.
«Мұндай шабуылдардың жалғасуы тек Катарды ғана нысанаға алмайды. Бұл бейбітшілік орнатуға тырысатын кез келген елге қауіп төндіреді және Біріккен Ұлттар Ұйымына деген сенімді әлсіретеді», – деді Шейх Мұхаммед бин Абдулрахман бин Жасим Әл-Тани.
Ол «Бұл шабуыл Біріккен Ұлттар Ұйымының мүшесі болып табылатын мемлекеттің егемендігін бұзу болып табылады. Бұл бейбітшілікті қолдайтын мемлекеттердің өркениетті қозғалысына жат әрекет», – деді.
Шабуыл кезінде ХАМАС тойтарыс тобының бес мүшесі мен бір катарлық қауіпсіздік қызметкері қаза тапты. Бұл делегация АҚШ қолдаған атысты тоқтату ұсынысын талқылап жатқан еді.
Шейх Мұхаммед бұл шабуыл Израильдің «аймақты күшпен қайта құруға тырысып жатқанын» және өз әрекеттерін ақтау үшін «фундаменталистік идеяларға» сүйенетінін айқын көрсеткенін айтты.
Ол «Біз осындай шабуыл жасаған Израиль өкілдерін қалай қабылдаймыз? Сіздер араағайынға осындай шабуыл жасаған мемлекет туралы естідіңіздер ме?» – деп сұрады.
Араағайындықта табандылық
Катар басшысы Доханың араағайындыққа және дауларды бейбіт жолмен шешуге адал екенін атап өтті, бірақ өз қауіпсіздігіне қауіп төндіруге жол бермейтінін ескертті.
Ол Израиль басшылығын «қанқұмар экстремистер» деп айыптап, олардың «жазасыздыққа сенетінін» және Газа халқын қырып-жою арқылы аймақты тұрақсыздандырып жатқанын айтты.
Бейбітшілікке қол жеткізу үшін, оның айтуынша, атысты дереу тоқтату, тұтқындарды босату, Газаға гуманитарлық көмек көрсету және екі мемлекет шешімін жүзеге асыру қажет.
