Ресей президенті Владимир Путин Тәжікстанға мемлекеттік сапармен барып, осы елді Ресейдің "сенімді одақтасы" деп атады. Ол Тәжікстан президенті Эмомали Рахмонмен Душанбеде келіссөз өткізді.

«Шынында да біз аймақтағы күрделі жағдайды ескере отырып, қауіпсіздік пен қорғаныс мәселелерінде үнемі жұмыс істеп келеміз. Біз - сенімді одақтастармыз. Ресей бұған үлкен мән береді және одақтас ретінде барлық міндеттемелерін орындайды», – деді Путин.

Ресей-Тәжікстан қарым-қатынастарының барлық салада "өте оң" дамып жатқанын атап өткен Путин сауда-экономикалық байланыстары жақсы қарқынмен ілгерілеп жатқанын айтты. Оның айтуынша, биылғы жылдың алғашқы жеті айында екіжақты сауда айналымы 17 пайыздан астам өскен.

Путин Тәжікстанға сапары барысында бірқатар маңызды қадамдар жоспарлағанын білдірді.

«Біз бірлескен, мазмұнды мәлімдеме жасауымыз керек», – деді ол, барлық салада болашаққа бағытталған тәсілді анықтап, нақты жоспарлар құру қажеттігін атап өтті, бірақ егжей-тегжейлі түсіндірмеді. «Бұл міндетті түрде жүзеге асады, себебі екі жақ та кездесуімізге жақсы дайындалған», – деп қосты ол.

Өз кезегінде Рахмон Мәскеу мен Душанбенің қарым-қатынасындағы "оң қарқынға" қанағаттанатынын білдіріп, белсенді саяси диалогты сақтап отырғанын атап өтті.

«Сауда, экономика, мәдени және гуманитарлық байланыстар сәтті дамып келеді: сауда айналымы өсуде, гуманитарлық жобалар жүзеге асырылуда. Біз қауіпсіздік мәселелерінде, сондай-ақ халықаралық аренада тығыз ынтымақтастықтамыз», – деді Рахмон.

Путин Душанбеге сәрсенбі күні кешке үш күндік сапармен барды. Ол бейсенбі күні Ресей-Орталық Азия екінші саммитіне және жұма күні Тәуелсіз Мемлекеттер Достастығы Мемлекет басшылары кеңесінің отырысына қатысады.