«Израильдің Қауіпсіздік кабинеті басып алынған Батыс Шериядағы 13 елді мекенді заңдастыру және оларды бөлу жоспарын мақұлдады», - деп хабарлады асыра оңшыл Қаржы министрі Бецалель Смотрич.
«Біз елді мекендерді қалыпқа келтіру мен реттеуді жалғастырамыз. Жасырыну мен кешірім сұраудың орнына біз ту көтеріп, құрылыс жүргізіп, қоныстанамыз.
Бұл Яхуда мен Самарияда (Батыс Шерия) егемендікке жету жолындағы тағы бір маңызды қадам», - деді Смотрич жексенбі күні. Қоныстану бекеттерін бөлу туралы шешім сенбі күні кешке Кабинет отырысында қабылданды.
Палестиналық тойтарыс тобы ХАМАС бұл шешімді «жағдайды заңдастыруға бағытталған үмітсіз әрекет» деп айыптады.
ХАМАС мәлімдемесінде «Смотричтің мәлімдемелері елді мекендердің барлық түрлері халқымызды ығыстыруға, жеріміз бен қасиетті орындарымызды тартып алуға, жеккөрінішті апартеид режимін орнатуға бағытталған нәсілшіл отарлау жобасы және бұл барлық халықаралық заңға қайшы», - деді.
ХАМАС халықаралық қауымдастықты Израильдің Батыс Шериядағы заңсыз қоныстануын тоқтатуға шақырды.
770,000 заңсыз израильдік қоныстанушы
Палестиналық дереккөздерге сәйкес аймақта 2024 жылдың соңынан бері 180 елді мекен мен 256 қоныстану бекетінде шамамен 770,000 заңсыз израильдік қоныстанушы тұрады деген болжам бар.
Біріккен Ұлттар Ұйымы басып алынған Палестина аймағында барлық израильдік қоныстарды халықаралық құқыққа қайшы деп санайды және олардың кеңеюі екі мемлекет шешіміне қауіп төндіреді деп ескертеді.
Батыс Шериядағы жағдай шиеленісуде. Палестина Денсаулық сақтау министрлігінің мәліметінше 2023 жылдың 7 қазанында Газада шабуыл басталғаннан бері Израиль армиясы мен заңсыз қоныстанушылардың шабуылдарынан кем дегенде 937 палестиналық қаза тауып, 7,000-нан астамы жарақаттанған.
Шілде айында Халықаралық сот Израильдің бұл әрекетін заңсыз деп жариялап, басып алынған Батыс Шерия мен Шығыс Иерусалимдегі барлық қоныстарды эвакуациялауға шақырды.
