Түркия Республикасының вице-президенті Джевдет Йылмаз 2016 жылғы 15 шілдедегі төңкеріс әрекетіне байланысты: «15 шілдеден кейін өткен он жыл Түркия үшін ауқымды қайта құрылу мен есеп беру кезеңі болды. Мемлекетіміздің барлық құрылымдары басымыздан өткен осы ауыр тәжірибеден тиісті сабақты алып, өзгерген қауіпсіздік жағдайлары мен жаңа қатерлерге жауап бере алатындай анағұрлым қуатты әлеуетке ие болды», — деген сөздерді қолданды.
2016 жылғы 15 шілдеде Фетхуллахшы Террор Ұйымының мүшелері әскери төңкеріс әрекеті арқылы Түркия Республикасы үкіметін құлатуға тырысты. Төңкерісті ұйымдастырушылар бейбіт тұрғындарға оқ жаудырып, өз қолбасшыларына қарсы шықты және Түркия Ұлы Ұлттық Мәжілісі мен Президенттік кешенді бомбалады; салдарынан 253 адам қаза тауып, мыңдаған адам жарақат алды.
Дүйсенбі күні Анкарада “SETA” қоры тарапынан ұйымдастырылған «Он жылдығында 15 шілде» атты симпозиумда сөйлеген сөзінде Джевдет Йылмаз FETÖ туралы айта келіп, «Ол халқымыздың еркімен қалыптасқан заңды саяси құрылымды жоюды, мемлекетіміздің мекемелерін өз иерархиясына бағындыруды және Түркияның болашағына халықтың орнына ұйымның еркімен бағыт-бағдар беруді мақсат етті», — деді.
Йылмаз Түркия Ұлы Ұлттық Мәжілісінің бомбалануы, Президенттік кешеннің және тікелей президент Режеп Тайып Ердоғанның нысанаға алынуы, сондай-ақ қауіпсіздік мекемелеріне жасалған шабуылдар FETÖ -нің түпкі мақсаты не болғанын ашық көрсеткенін тілге тиек етті.
«Қырағы болуымыз керек»
Президент Режеп Тайып Ердоғанның басшылығымен түрік халқы көрсеткен тарихи табандылық бұл арам пиғылды бұзғанын, мемлекет өміріндегі заңдылықтың бірден-бір қайнар көзі халықтың еркі екендігін ешқандай күмән келтірмейтіндей етіп тағы бір мәрте растағанын білдірген Йылмаз: «Бүгінде мемлекетіміз төніп тұрған қатерлерге тек бір сәтке жауап қату деңгейінен асып түсіп, қауіп-қатерлерді алдын ала талдайтын, қажетті шараларды дер кезінде қабылдайтын және дағдарыстарды тиімді басқара алатын қуатты институционалдық әлеуетке ие болды. Бұл тәжірибе Түркияның өз аймағында өз мойнына алған жауапкершіліктерін де күшейте түседі», — деді.
«FETÖ кетті, бірақ оған ұқсас құрылымдар тұрғысынан өте сақ болуымыз керек» деген Йылмаз: «Халықаралық аренада FETÖ -мен күрес жүргізу бағытында біздің мойнымызда өте маңызды жауапкершілік бар деп сенемін. Бұл тәжірибемізді дос, бауырлас елдермен міндетті түрде бөлісуіміз керек. Түркия бұл сынақты басынан өткерді, басқалар мұны басынан өткермесін, Түркияның тәжірибесінен үйренсін», — деген баға берді.
Йылмаз сөзінің соңында террордың біржолата жойылуы, қазіргі таңда жалғасып жатқан «Террорсыз Түркия» процесін қоса алғанда, демократияны, дамуды және аймақтық қауіпсіздікті нығайта түсетінін атап өтті.
