COVİD-19 Азияның кейбір аймағында соның ішінде Гонконг, Сингапур, Қытай және Таиландта қайта жанданды. Инфекциялар мен ауыр жағдайлардың көбеюі назар аударарлық.
Жаңадан пайда болған «NB.1.8.1» нұсқасы әлемнің кейбір аймақтарына таралуда. Дүниежүзілік денсаулық сақтау ұйымы (ДДСҰ) осы аптада аурудың көбеюі Шығыс Жерорта теңізі, Оңтүстік-Шығыс Азия және Батыс Тынық мұхиты аймақтарында шоғырланғанын атап өтті.
Дүниежүзілік денсаулық сақтау ұйымы «Omicron» субварианты «NB.1.8.1»-ді алдыңғы нұсқалардан ажырата алатын кейбір генетикалық ерекшеліктеріне байланысты «бақылаудағы нұсқа» (VUM) ретінде белгіледі.
Алғаш рет 2025 жылдың қаңтарында жиналған үлгілерде анықталған нұсқа, әсіресе Азияда тез таралып, халықаралық денсаулық сақтау агенттіктерін бақылауды арттыруға итермелеуде.
Мамыр айының басындағы Австралиядағы деректерге қарағанда «NB.1.8.1» Оңтүстік Австралиядағы науқастардың 10 пайызынан азын, Викторияда 40 пайыздан астамын құрайтынын көрсетеді.
Батыс Австралияда ағынды суларға жасалған анализ бұл варианттың штат орталығы Пертте басым екенін көрсетеді. Ұлттық денсаулық сақтау өкілдері халық аз тексерілгендіктен вирусты бақылау қиындап бара жатқанын айтты.
Вирустық генетикалық секвенирлеудің жаһандық дерекқоры «GISAID»-тың халықаралық деректеріне сәйкес, «NB.1.8.1»-варианты Франция, Жапония, Нидерланды, Оңтүстік Корея, Испания, Тайвань және Таиландтан келген саяхатшыларда анықталған.
Сонымен қатар «LP.8.1» нұсқасы Америка Құрама Штаттарында және бүкіл әлемге таралған нұсқа болып қала береді. Денсаулық сақтау қызметкерлері «NB.1.8.1»-дің негізгі белгілері қызба немесе қалтырау, жөтел, ентігу, тамақ ауруы, мұрынның бітелу немесе ағуы, дәмнің немесе иіс сезудің жоғалуы, бас ауруы, жүрек айнуы және шаршау сияқты бұрынғы «Omicron» субварианттарына сәйкес келетінін хабарлайды.
ДДСҰ мәліметтері бойынша қазіргі COVİD-19 вакциналары жаңа нұсқадан қорғайды деп күтілуде.
