ÖSYM таратқан мәлімдемеге сәйкес, біраз уақыттан бері дайындалып жатқан e-YDTS түрік тілін емтихан форматында анықтауға арналған алғашқы жүйе болмақ.
Түркияның халықаралық миссиясына үлес қосуы көзделген e-YDTS емтиханы Адана, Анкара, Стамбул және Измир қалаларындағы ÖSYM-нің электронды емтихан орталықтарында цифрлық форматта өтеді.
ÖSYM төрағасы, профессор Байрам Али Ерсой e-YDTS-ке дайындық жұмыстары аяқталып, емтиханды өткізу кезеңі жақындағанын хабарлады.
Ерсой: «Халықаралық тілге айналған тілімізді меңгеру деңгейін анықтау мақсатында ұзақ уақыт бойы дайындалып келген емтихан жүйемізді сенбі күні іске қосамыз. Бұл жоба көп жылдан бергі арман еді, оны жүзеге асыру бізге бұйырды. Арманымыз орындалуда, құтты болсын!», - деді.
Ерсойдың айтуынша, e-YDTS шетелдік студент санының артуына байланысты сұранысқа жауап ретінде және түрік тілін оқытудағы сараптау стандарттарын қамтамасыз ету үшін әзірленген. Емтихан үміткерлердің түрік тілін меңгеру деңгейін Тілдерге арналған Еуропалық ортақ құзырет шеңберіне (CEFR) сәйкес бағалайтын орталықтандырылған жүйе ретінде дайындалды.
Ерсой 9 мамырда электронды емтихан орталықтарында өтетін тестке дайындық аясында 8 сынақ емтиханы ұйымдастырылғанын мәлімдеді.
«Түрік тілінің академиялық қуатын көрсетеді»
Ерсой емтихан мазмұнының, сұрақ авторлары мен бақылаушылардың CEFR талаптарына сәйкестігін қамтамасыз ету мақсатында Анкара, Стамбул, Измир, Карабүк, Малатия және Ван қалаларында 8 мәрте «CEFR және сұрақ дайындау» бойынша оқыту бағдарламасы өткізілгенін айтты.
Сондай-ақ ол емтиханнан «өту ұпайын» анықтау жұмыстары аяқталғанын және барлық дайындықтың тәмамдалуымен емтихан өткізу кезеңіне өткенін жеткізді.
Ерсой емтиханның шетелдік студенттер үшін маңызды көрсеткіш болатынын білдіріп, e-YDTS арқылы үміткерлердің тілдік дағдылары CEFR стандартына сай бағаланатынын және оларға B2, C1 және C2 деңгейлерінде жарамды, әрі сенімді түрік тілі сертификаты берілетінін жеткізді.
Оның айтуынша, бұл емтихан түрік тілінің академиялық әлеуетін көрсететін маңызды қадам болмақ, әрі білім беру мекемелері, кәсіби ұйымдар, мемлекеттік мекемелер және басқа да құрылымдар үшін халықаралық стандарттарға сай сенімді бағалау құралына айналады.
Емтихан нәтижелері 10 маусымда жарияланады.
Ерсой сөзін былай қорытындылады: «Мекемелер мен ұйымдар қажет деп тапқан жағдайда, осы емтихан нәтижелерін өз ережелеріне сәйкес түрік тілін шет тілі ретінде меңгеру деңгейін бағалауда пайдалана алады. Тіл — тек қарым-қатынас құралы ғана емес, сонымен қатар өркениеттің арқауы. Біздің мақсатымыз — түрік тілінің әлем бойынша кең әрі жүйелі оқытылуына үлес қосу. Осы түсінікпен жүзеге асырылатын емтихан еліміздің халықаралық білім беру миссиясына да үлес қоспақ.»
