Жергілікті биліктің мәліметінше, жексенбі күні Мексиканың орталығында орналасқан Гуанахуато штатында футбол алаңына жасалған қарулы шабуыл салдарынан кемінде 11 адам қаза тауып, тағы 12 адам жарақат алған.
Шабуыл Саламанка қалашығындағы бір ауданда болған. Қала әкімдігі таратқан мәлімдемеде шабуылға қатысы бар тұлғаларды анықтау үшін арнайы операция басталғаны айтылды.
Мәлімдемеде: «11 адамның қаза тапқаны расталды. Олардың 10-ы оқиға орнында, ал біреуі ауруханада ем қабылдап жатқан кезде көз жұмды. 12 адам болса оқ жарақатын алып, емделіп жатыр», – делінген.
Сол қалашықта сенбіге қараған түні адам денесінің бөлшектері салынған төрт сөмке де табылғаны хабарланды.
Өнеркәсібі дамыған, сондай-ақ бірнеше танымал туристік нысаны бар өңір болғанына қарамастан Гуанахуато қылмыстық топтар арасындағы қақтығыстарға байланысты елдегі ең қауіпті штат болып отыр.
Мексика президенті Клаудия Шейнбаум жыл басында ұлттық қауіпсіздік стратегиясының арқасында 2025 жылы елдегі кісі өлтіру деңгейі соңғы он жылдағы ең төмен көрсеткішке түскенін хабарлады.
