Жүз мыңдаған кубалық 1 мамыр күні Гаванада өткен митингке қатысып, АҚШ-тың 60 жылдық сауда эмбаргосы мен халықаралық медициналық миссияларына қойған шектеулеріне наразылық білдірді.
Бейсенбі күні өткен бұл митинг елде 2022 жылдан бері өткізілген алғашқы ірі шеру болды. Алайда терең экономикалық дағдарысқа тап болған коммунистік елде жанармай тапшылығына байланысты бұған дейін де шағын шерулер болған еді.
Наразылық білдірушілер атақты Малекон жағалауы бойынан бастап үкіметтің орталығы саналатын Революция алаңына дейінгі кең көшелерге жиналды.
Дәрігерлер мен медбикелерден құралған бір топ шеруші ұлттық қаһарман Хосе Марти ескерткішінің жанынан өтіп, «Блокада жойылсын» және «Еркін Куба жасасын» деп ұрандады.
Шеруді Куба революциясының көшбасшысы Фидель Кастроның інісі, бұрынғы президент Рауль Кастро мен қазіргі президент Мигель Диас-Канель тамашалады.
Трамптың аралға бағытталған санкциялары
АҚШ президенті Дональд Трамп қызметке кіріскен күні өзінен бұрынғы президент Джо Байденнің Кубаны «терроризмді қолдайтын елдер» тізімінен шығару туралы шешімін кері қайтарып, аралға қарсы қатаң санкциялардың жолын ашты.
Бір айдан кейін АҚШ әкімшілігі Кубаның шетелге дәрігер жіберу бағдарламасына қатысты виза шектеулерін күшейтті. Бұл бағдарлама Кубаға маңызды валюталық кіріс әкелетін, әрі елдің ықпалын арттыратын ондаған жылдық бастама болатын, бірақ Вашингтон оны «мәжбүрлі еңбек» деп сипаттады.
“AFP” агенттігіне сұхбат берген жасы 50-дегі зертхана технигі Александр Гарсия балдаққа сүйеніп митингке қатысты. Ол: «Бүгін осында келіп, революцияны қорғау — маңызды қадам», — деді.
Куба Жұмысшылар Орталық одағының жетекшісі Улисес Гиларте Трамп әкімшілігін «ашаршылық тудырып, елді тұрақсыздандыруға әрекет жасауда» деп айыптады.
Гиларте Вашингтонның Кубаның медициналық бригадалары бағдарламасына қарсы жүргізіп жатқан науқанын «адамгершілікке жат» деп атады.
