Мысырдың Шарм-эль-Шейх қаласында болған көлік апатында Катардың үш дипломаты қаза тапты. Бұл туралы Мысыр баспасөзі хабарлады.
Оқиға жексенбі күні таңертең Оңтүстік Синайдағы негізгі жолда болды. Катардың делегациясы мінген көлік апатқа ұшырады. Апатта үш дипломат қаза тауып, екі дипломат жарақат алды.
Бұл оқиға Шарм-эль-Шейх пен Таба арасындағы жолда болды.
Қаза тапқандардың денелері Шарм-эль-Шейх халықаралық ауруханасының мәйітханасына, ал жарақат алғандар дереу ауруханаға жеткізілді.
Дүйсенбі күні Шарм-эль-Шейх қаласында халықаралық Газа саммиті өтеді. Бұл саммитке Мысыр мемлекет басшысы Абдель Фаттах ас-Сиси мен АҚШ президенті Дональд Трамп төрағалық етеді, жиналысқа 20-дан астам елдің өкілдері қатысады.
Мысыр басшысының мәлімдемесіне қарағанда, саммиттің мақсаты – Газа секторындағы соғысты тоқтату, Таяу Шығыста бейбітшілік пен тұрақтылықты нығайту және аймақтық қауіпсіздік пен тұрақтылықтың жаңа кезеңін бастау.
