АҚШ президенті Дональд Трамп мамыр айының ортасында Эр-Риядта Сирияның жаңа президенті Ахмед әл- Шарамен кездескеннен кейін АҚШ әкімшілігі Иранға қарсы ондаған жыл бойы енгізіліп келген санкцияларын жеңілдетті.
АҚШ-тың Сирия жөніндегі арнайы өкілі Томас Баррак Сириядағы қақтығыстар басталғаннан кейін 2012 жылы жабылған елшіліктің резиденциясына 12 жылдан астам уақыттан соң алғаш рет АҚШ туын көтерді. Сирияның жаңа үкіметімен бірнеше ай бойы салыстырмалы түрде шектеулі байланыста болған АҚШ соңғы апталарда байланыстарын жедел нығайта бастады. Елдегі елшілік қызметін ресми түрде қайта бастағаны жарияланбаса да, Баррактың сапары маңызды кезең деп бағалануда.
Қазіргі кезде АҚШ-тың Түркиядағы елшісі болып саналатын Баррак 23 мамырда Сирияға АҚШ-тың арнайы өкілі ретінде тағайындалып, елге алғашқы ресми сапарын жасап отыр. АҚШ Дамасктегі елшілігін 2012 жылы ақпан айында сол кездегі Сирия президенті Башар Асадқа қарсы басталған наразылықтардан бір жыл өткеннен кейін елді он жылдан астам уақытқа созылған қанды қақтығысқа айналдырған кезеңде жауып тастаған болатын.
Сол тұстағы АҚШ елшісі Роберт Форд елшілік жабылардың алдында аз ғана уақыт бұрын Сириядан кері шақыртылған еді. АҚШ-тың кейінгі Сириядағы елшілері шетелде қызмет атқарып, Дамаскіге сапар шекпеген болатын.
Сириядағы 14 жылдық соғыс барысында жүз мыңдаған адам қаза тауып, миллиондаған тұрғын ел ішінде және сыртында босқынға айналған.
25 жылдан кейінгі тарихи кездесу
АҚШ президенті Дональд Трамп мамыр айының ортасында Сирияның жаңа президенті Ахмед әл- Шарамен Эр-Риядта жүздесті, ал өткен жұмада АҚШ әкімшілігі Асад әулетінің ондаған жылдық билігі кезінде Сирияға енгізілген америкалық санкцияларды жеңілдетті. Трамп бұл қадамның Түркия президенті Режеп Тайып Ердоған мен Сауд Арабиясының тақ мұрагері Мұхаммед бен Салманнан түскен өтініштер негізінде қабылданғанын мәлімдеді. Өткен айда Сауд Арабиясы Патшалығына жасаған сапары барысында Трамп Эр-Риядта әл- Шарамен кездесті.
Бұл АҚШ пен Сирия басшылары арасындағы 25 жылдан кейінгі тарихи кездесу болды. Бұған дейінгі соңғы кездесу 2000 жылы Женевада АҚШ-тың сол кездегі президенті Билл Клинтон мен Хафиз Асад арасында өткен болатын.
