Түркия Республикасының Сыртқы істер министрі Хакан Фидан Түркия мен Оңтүстік Кореяның ядролық энергетика, көлік, қорғаныс өнеркәсібі және жоғары технологиялар сияқты стратегиялық салаларда жүзеге асырылуы мүмкін бірлескен бастамаларды талқылағанын мәлімдеді.
Сеулдегі кездесулерден кейін Сыртқы істер министрі Хакан Фидан Түркия мен Оңтүстік Кореяның түрлі саладағы екіжақты ынтымақтастықты тереңдетуге деген ұмтылысы қайта растағанын айтты.
Бейсенбі күні “X” әлеуметтік желісінде жариялаған жазбасында Фидан:
«Сауда-экономикалық байланыстарымызды дамыту және өзара инвестицияларды арттыру бағытындағы ортақ еркімізді растадық», - деді.
Министрдің айтуынша, тараптар сондай-ақ ядролық энергетика, көлік, қорғаныс өнеркәсібі және жоғары технологиялар секілді стратегиялық секторларда іске асырылуы мүмкін бірлескен жобаларды талқылады.
Фидан келіссөздер барысында Азия–Тынық мұхиты аймағы мен Таяу Шығыстағы оқиғаларды қоса алғанда, өзекті өңірлік және жаһандық мәселелер бойынша жан-жақты пікір алмасу жүргізілгенін жеткізді.
Сонымен қатар ол екі елдің Біріккен Ұлттар Ұйымы, MIKTA (Мексика, Индонезия, Оңтүстік Корея, Түркия және Австралия арасындағы бейресми серіктестік) және G20 сияқты халықаралық платформалардағы тығыз ынтымақтастығының маңыздылығы тағы да расталғанын атап өтті.
Корея университетінде сөйлеген сөзінде Фидан халықаралық жүйенің алдында тұрған сын-қатерлер мен жаһандық басқарудың болашағына қатысты өз бағаларын бөлісіп, Түркияның көзқарасын таныстырғанын айтты.
Фидан өз жазбасында сондай-ақ:
«Шейіттеріміз бен ардагерлеріміздің қастерлі рухы екі ел арасындағы мәңгі достықтың белгісі ретінде келер ұрпақтарға шабыт беруді жалғастыра береді», - деді.
Министр сөзін:
«Алдағы кезеңде Түркия мен Корея Республикасы арасындағы стратегиялық әріптестікті өзара тиімділік негізінде одан әрі тереңдете береміз», - деген қорытындымен аяқтады.
