Түркияның Ұлттық Қорғаныс министрлігі мен Вьетнам Социалистік Республикасының Қорғаныс министрлігі арасында Стамбулда өтіп жатқан IDEF 2025 Халықаралық Қорғаныс Өнеркәсібі Көрмесі аясында қорғаныс саласында ынтымақтастық туралы хаттамаға қол қойылды.

Сейсенбі күні өткен қол қою рәсімінде сөйлеген сөзінде Ұлттық қорғаныс министрінің орынбасары Мұса Хейбет: "Вьетнам Қорғаныс министрлігі мен Ұлттық қорғаныс министрлігіміз арасындағы бұл қорғаныс және қауіпсіздік саласындағы ынтымақтастық бізге алдағы уақытта жаңа жобалар мен әріптестіктерді дамытуға жол ашады деп сенемін," – деді.

Хейбет Түркияның қорғаныс өнеркәсібі компаниялары мен Ұлттық қорғаныс министрлігі арқылы Вьетнамның әуе, құрлық және теңіз платформаларына толық қолдау көрсетілетінін атап өтті.

Вьетнам Ұлттық Қорғаныс министрінің орынбасары, генерал-лейтенант Хоанг Суан Чиен: "Қазір біз Вьетнам мен Түркия арасындағы тарихи сәтке куә болып отырмыз. Қорғаныс саласындағы ынтымақтастық келісіміне қол қойдық. Бұл сәт – көптеген жаңа әріптестіктер мен жаңадан ашылған бетбұрыстың бастамасы. Көрменің сәтті жалғасуын тілеймін. Түркиямен одақтас болу үшін бар күшімізді салуға дайынбыз," – деді.

Сейсенбі күні басталған және алты күнге созылатын қорғаныс көрмесі Стамбул Көрме Орталығында (İFM), Ататүрік әуежайында, “Wow” қонақүйінде және Атакөй кемежайында қатар өткізілуде.

Көрме Түркия Президентінің Қорғаныс өнеркәсібі басқармасы мен Түрік Қарулы күштерін нығайту қорының жетекшілігі және “KFA” көрме ұйымдастыру компаниясының үйлестіруімен жүзеге асырылуда.