Канадалықтар қазіргі Либералдар партиясына тағы төрт жылға мандат берді және премьер-министр Марк Карнидің АҚШ президенті Дональд Трамптың кедендік баж салығы мен Канадаға көз тігу әрекеттерімен күресе алатынына сенім артты.

Карни Канада Ұлттық банкі мен Англия Банкінің бұрынғы басшысы ретінде қаржылық тәжірибесіне сүйеніп, канадалықтарға кедендік соғыстар мен Трамппен жасалған жаңа сауда келісімі сияқты күтпеген экономикалық жағдайларда елді алға бастыра алатыны туралы сенім ұялатты.

Консерваторлар партиясының жетекшісі Пьер Пуальевр Джастин Трюдоның он жылдық баяу дамыған Либералдар үкіметіне қарсы өзгеріс уәдесімен сайлау науқанын жүргізді, бірақ жеңіс үшін бұл жеткіліксіз қалды.

Канадалықтар оның үндеуін қабылдамады. Айлар бойы жүргізілген сауалнамаларда либералдардан алда келе жатқан Пуальеврге бұл ауыр жеңіліс болды.

Алайда халық арасында беделі төмендеген Трюдоның отставкаға кетуі және Либералдар партиясының көшбасшылық съезінен кейін саясатқа жаңадан келген Карнидің басшылықты қолға алуы жағдайды өзгертті.

Либералдар қоғамдық пікір сауалнамаларында тез алға шықты, консерваторларды артта қалдырды және 27 сәуірдегі соңғы сауалнама күні төрт пайыздық артықшылықпен алда болды.

Сайлау нәтижелері әлі анық емес

Сайлаушылар Карнидің Трамппен бетпе-бет келгенде елді тұрақты басқара алатын тұлға екеніне сенді.
Дегенмен Карни әсіресе Канада сияқты мемлекетті басқару деңгейінде бұған дейін саясатта болған емес.

Сайлау іс жүзінде екі партияның арасында өтті. Джагмит Сингх жетекшілік ететін Жаңа Демократиялық партия елеулі қарсылас бола алмады.

Ел бойынша 343 орын үшін сайлау өтті, ал жеңіс үшін кемінде 172 орын қажет.

Канада географиялық тұрғыдан өте үлкен ел болғандықтан алты уақыт белдеуіне ие. Дауыстар әлі де саналып жатыр, сондықтан Карнидің мәжілісте көпшілік орынды алып алмайтыны белгісіз.