Ресей Украинадағы шабуылын қолдаған азиялық одақтасымен байланыстарды нығайту мақсатында Солтүстік Кореяға тікелей коммерциялық әуе рейстерін бастады.
Ресейдің «Nordwind Airlines» әуе компаниясы орындаған Мәскеу-Пхеньян рейсі Мәскеудің Шереметьево әуежайынан жексенбі күні жергілікті уақыт 16:25-те 400-ден астам жолаушымен ұшты.
Ресей Көлік министрлігі сұранысты қанағаттандыру үшін айда бір рет рейс ұйымдастырылатынын хабарлады.
Ресей Сыртқы істер министрі Сергей Лавров осы айдың басында Солтүстік Кореяның жаңа Вонсан-Кальма жағажай курортына барып, Солтүстік Корея басшысы Ким Чен Ынмен кездескен болатын. Лавров ресейлік туристерді кешенге баруға шақыратынын айтты.
20 000-ға жуық адамды қабылдай алатын шипажай Кимнің қиын жағдайдағы экономиканы қалпына келтіру үшін туризмді дамытуға бағытталған жобаларының бірі.
Солтүстік Корея шекараларын қайта ашып, пандемия кезіндегі шектеулерді біртіндеп жеңілдетуде. Алайда халықаралық туризмді қайта ашу туралы мәлімет берілмеді.
Еуропалық Одақ Ресей рейстеріне тыйым салғанға дейін ресейлік туристерді Еуропаның демалыс орындарына тасымалдаған «Nordwind Airlines» әуе компаниясы Солтүстік Кореяға билет бағасын 570 доллар деп белгіледі.
Толық аты-жөнін айтудан бас тартқан «Nordwind» қызметкері Олег «AFP» агенттігіне: «Бұл екі ел арасындағы байланысты нығайтатын тарихи оқиға», - деді.
«Дипломатиялық қарым-қатынасымыздың 70 жылдан астам тарихында алғаш рет екі ел астаналары арасында тікелей әуе рейсін ашамыз», - деді Ресей Көлік министрінің орынбасары Владимир Потешкин министрліктің «Telegram» аккаунтындағы жазбасында.
Ресейдің «ТАСС» мемлекеттік ақпарат агенттігі Пхеньяннан Мәскеуге алғашқы рейс сейсенбі күні орындалатынын хабарлады.
Ресей мен Солтүстік Корея 2020 жылы «Covid» кезінде тоқтатылған теміржол қатынасын 17 маусымда қайта ашты.
Соңғы жылдары екі ел жақынырақ әскери байланыс орнатып, Пхеньян Ресейдің Украинадағы әскери операцияларын сарбаз және қару-жарақпен қамтамасыз етті.
Өткен жылы Ресей президенті Владимир Путиннің Солтүстік Кореяға сапары кезінде екі ел өзара қорғаныс келісіміне қол қойды.
Сәуір айында Солтүстік Корея Ресей әскерлерімен бірге өз әскерлерінің бір бөлігін Украинадағы майданға алғаш рет орналастырғанын растады.
