Израиль күштері басып алынған Батыс Шерияда жүргізген рейд барысында 50 палестиналықты қамауға алды.
Палестинаның «WAFA» ақпарат агенттігінің хабарлауынша, Израиль әскерлері таңертең Батыс Шерияның солтүстігіндегі Наблус пен оңтүстігіндегі Бейт-Лахм қалаларына рейд жүргізген.
Палестиналықтардың үйлеріне күшпен кіріп, тінту жүргізген және тұрғындарға дөрекі қарым-қатынас жасаған Израиль әскерлері Наблуста 9 адамды қамауға алды.
Бейт-Лахм қаласында 7 палестиналықты ұстап әкетті. Сонымен қатар Израиль күштері Салфит қаласының Карава елді мекеніндегі рейд кезінде тағы 4 адамды қамауға алды. Рейд жүргізілген үйлердегі жиһаздарға зақым келтіріліп, ұсталғандардың бірінің көлігі тәркіленді.
Израиль күштері Хеврон қаласының батысындағы Изна елді мекеніне кіреберіс жолдарды жауып, көшелерде әскери көліктермен бақылау жүргізді.
Израиль әскерлері үйлерге басып кіріп, тінту жүргізді және тұрғындардан жауап алды. Тінту мен көшеде жауап алу кезінде кейбір адамдарды ұрып-соғып, үйлердегі заттарды бүлдірген.
Израиль күштері Хевронда бір журналистпен бірге 30 палестиналықты қамауға алды.
Израиль күштері бұл мәселеге қатысты әзірге мәлімдеме жасаған жоқ.
