Газа аймағындағы Палестина үкіметінің медиа кеңсесі сейсенбі күні жасаған мәлімдемесінде бітім күшіне енгеннен бері гуманитарлық жүк тасыған 986 көліктің аймаққа кіргенін, бұл көрсеткіштің бітім келісімінде қарастырылған мөлшерден әлдеқайда төмен екенін хабарлады.

Мекеменің дерегінше, дүйсенбі күні кешке дейін Газаға 6 600 жүк көлігі, ал тәулігіне 600 жүк көлігі кіруі тиіс болатын. Бірақ бұл көрсеткіш 89-дан аспай отыр.

Медиа кеңсесі: «Бұл Израиль оккупациясының Газа секторындағы 2,4 миллионнан астам палестиналыққа қысым көрсету, аштыққа ұшырату және гуманитарлық бопсалау саясатын жалғастырып отырғанының айғағы»,- деді.

Аймаққа наубайханалар, ауруханалар, генераторлар мен өзге де маңызды қызметтерді қамтамасыз ету үшін 14 жүк көлігіне тиелген тұрмыстық газ баллондары мен 28 жүк көлігіне тиелген дизель отыны жеткізілген.

Алайда үкімет бұл көлемнің Газаның негізгі қажеттіліктерін өтеуге жеткіліксіз екенін атап өтіп, «Азық-түлік, дәрі-дәрмек, гуманитарлық көмек, отын және тұрмыстық газ секілді заттарды қамтитын кемінде 600 көмек көлігінің күн сайын тұрақты түрде кіруі маңызды», - деді.

10 қазан күні Газа секторында АҚШ президенті Дональд Трамп ұсынған жоспар негізінде бітім келісімі күшіне енген болатын. Бұл жоспардың алғашқы кезеңі тұтқын алмасуды қамтыды. Жоспардың келесі кезеңі Газаны қалпына келтіру мен ХАМАС-сыз жаңа басқару механизмін құруды көздейді.

Палестина Денсаулық сақтау министрлігінің дерегінше, 2023 жылдың қазан айынан бері Израильдің геноцид соғысында 68 200-ден астам адам қаза тауып, 170 200-ден астам адам жараланған.