Мемлекеттік «Синьхуа» ақпарат агенттігінің хабарлауынша, Қытай «Zhuque-2E Y4» тасымалдаушы зымыранын пайдаланып, 10 спутникті сәтті ұшырды. Бұл спутниктердің сегізі орбитада жасанды интеллект есептеу мүмкіндіктерін дамыту үшін жобаланған.
«Синьхуа» агенттігінің мәліметінше, зымыран жергілікті уақытпен сағат 19.40-та Қытайдың солтүстік-батысындағы Дунфэн коммерциялық ғарыштық инновациялық пилоттық аймағынан көтеріліп, 10 спутниктің барлығын жоспарланған орбиталарына орналастырды.
Спутниктердің сегізі қытайлық коммерциялық авиация және ғарыш компаниясы “ADAspace” тарапынан әзірленген «Star Compute» жобасының екінші тобына тиесілі.
«Таң-ымырт» (dawn-dusk) орбиталарында жұмыс істеуге арналған бұл спутниктер жоғары өнімді есептеу жүйелерін, лазерлік байланыс жабдықтарын және төмен жарық жағдайларына сезімтал камераларды тасымалдайды.
Спутниктер 10 000 ватт қуаттылықтағы сұйық салқындату жүйелерін, кеңейтілетін салқындату құрылымдарын, ғарыштық лазерлік байланыс желілерін және тікелей орбитада жасанды интеллекттің негізгі модельдерін оқыту сияқты технологияларды сынайтын болады.
“ADAspace” бұл тапсырманың ғарыштық есептеу саласындағы технологиялық дамуды және коммерциялық қолданыстарды жеделдететінін мәлімдеді.
Орбиталық жасанды интеллект желісі жоспарлары
Компания орбитада 2800 есептеу спутнигінен тұратын жасанды интеллект инфрақұрылым желісін құруды мақсат етеді.
Алғашқы 12 спутниктік топ 2025 жылдың мамыр айында ұшырылған еді. “ADAspace” қаңтар айында жасаған мәлімдемесінде Alibaba-ның “Qwen3” жасанды интеллект моделін орбитадағы есептеу желісіне интеграциялап, жасанды интеллект операцияларының тікелей ғарышта жүзеге асырылуын қамтамасыз еткенін хабарлаған болатын.
Компания 2030 жылға қарай 1000 спутниктік желі құруды және 2035 жылға қарай одан да үлкен спутниктер желісін толық аяқтауды жоспарлап отыр.
