Конго Демократиялық Республикасының шығысындағы Итури уәлаятында Одақтас демократиялық күштер көтерілісшілері ұйымдастырған шабуыл салдарынан кемінде 21 адам қаза тапты.
Аймақтық әкімшілік басшысының орынбасары полковник Максим Чишимбидің айтуынша, Мамбаса аумағындағы Биакато ауылында болған шабуыл кезінде көптеген адам із-түзсіз жоғалған.
Жексенбі күні жүргізілген іздестіру жұмыстары барысында бірнеше мәйіт табылып, қаза тапқандар саны 21-ге жетті.
Максим Чишимби Конго армиясының лаңкестерге қарсы операция бастағанын айтып, жергілікті тұрғындарды армиямен ынтымақтасуға шақырды.
Көтерілісшілер кейбір бейбіт тұрғындарды ұрлап әкетпес бұрын мотоциклдер мен үйлерді қиратқан.
ДАИШ лаңкестік ұйымымен байланысы бар бұл топ бірнеше жылдан бері Конгоның шығысына шабуылдап келеді.
Конгоның шығыс өңірлері отыз жылдан бері түрлі қарулы топтардың әрекеттерінен туындаған тұрақсыздықпен бетпе-бет келіп отыр. Аймақтағы мыңдаған адам Солтүстік Киву мен Итури уәлаяттарындағы босқын лагерьлерінде тұрады.
Халықаралық құқық қорғау ұйымы адам құқықтарының өрескел бұзылуынан бейбіт тұрғындардың жапа шегіп жатқанын атап өтті.
Ұйымның Бас хатшысы Аньес Калламар: «Конго Демократиялық Республикасының шығысындағы бейбіт тұрғындар Одақтас демократиялық күштер содырларының қолынан аса ауыр қатыгездікке ұшырады. Адамдар, өлтірілді, ұрланды және азапталды», - деді.
Сондай-ақ шығыста әрекет ететін «M23» қарулы тобы туралы айтылды.
Уганда мен Конго Демократиялық Республикасының қарулы күштері 2021 жылдан бері көтерілісшілерге қарсы бірлескен операция жүргізіп келеді.
