Түркия Ливан мен Оңтүстік Кипр грек әкімшілігі арасында жасалған жаңартылған Ерекше экономикалық аймақты айқындау туралы келісімді сынға алды. Анкара келісімнің Кипр түріктерінің құқықтарын шектейтінін және бүкіл аралды қамтымайтынын мәлімдеді.

Түркия Сыртқы істер министрлігінің өкілі Өнжү Кечели бұл мәселе туралы «X» платформасында жазба жазып, 2003 жылдан бері грек әкімшілігінің «аралдың егемендік тұрғысынан тең құқылы элементі» деп сипаттаған Кипр түріктерінің қатысуынсыз өңірдегі жағалауға иелік ететін мемлекеттермен екіжақты теңіз шекарасын айқындау келісімдерін жасап келе жатқанын атап өтті.

Кечели Ливан мен грек әкімшілігі арасындағы соңғы келісімнің алғаш рет 2007 жылы аяқталғанын, алайда 26 қарашада қайта қол қойылғанға дейін күшіне енбегенін айтты.

Оның сөзінше, келісімдегі аймақ Түркияның 2020 жылдың 18 наурызында БҰҰ-да тіркелген құрлықтық қайраңынан тыс орналасқанына қарамастан, Анкара мәселені Кипр дауының контексінде қарастырады және кез келген теңіз юрисдикциясына қатысты келісімдерде Кипр түріктерінің құқықтары маңызды орын алуы тиіс.

Кечели «Ливан немесе өңірдегі басқа мемлекеттердің Оңтүстік Кипр грек әкімшілігімен мұндай келісімдерге қол қоюы Кипр түріктерінің аралдағы тең құқықтары мен мүдделеріне тікелей әсер етеді», - деп жазып, грек әкімшілігінің аралдың барлық бөлігін қамтитын шешімдер қабылдауға құқығы жоқ екенін еске салды.

Сондай-ақ ол аймақтағы елдер мен халықаралық қауымдастықты грек әкімшілігінің біржақты қадамдарын қолдамауға, Кипр түріктерінің заңды құқықтары мен мүдделерін бұзуға бағытталған әрекеттерге жол бермеуге шақырды.

Кечели сөзін «Түркия Солтүстік Кипр Түрік Республикасымен бірге Кипр түріктерінің құқықтары мен мүдделерін табанды түрде қорғайды», - деп түйіндеді.