Мысыр Сыртқы істер министрлігінің мәліметінше, Каирде басқосқан тараптар атысты тоқтату үдерісін ілгерілету және жергілікті түйткілдерді шешу мақсатында «жол картасы» сипатындағы жобаны талқылады.
Кездесуге Түркия Ұлттық барлау ұйымының басшысы Ибраһим Калынмен қатар Мысыр мен Катардың жоғары лауазымды өкілдері және палестиналық топтардың өкілдері қатысты.
Тараптардың үдерісті алға жылжытуға қатысты пікір алмасуы нәтижелі өткен.
Келіссөздер барысында атысты тоқтату келісімінің алғашқы кезеңі бойынша міндеттемелерді толық орындау, гуманитарлық көмек жеткізуді арттыру және өңірде бейбітшілікті сақтау мәселелері қаралды.
Сондай-ақ Газаны басқару, қайта қалпына келтіру, халықаралық күштерді орналастыру және бітімнің орындалуын қамтамасыз ету мәселелері де күн тәртібінде болды.
Атысты тоқтату туралы келісім 2025 жылдың 10 қазанында күшіне енген болатын. Алғашқы кезеңде тұтқын алмасу, гуманитарлық көмекті арттыру және кейбір аудандардан Израиль күштерін шығару сияқты қадамдар басылды. Алайда палестиналық дереккөздер Израильдің келісім бойынша міндеттемелерін толық орындамағанын және шабуылдардың жалғасып жатқанын мәлімдеуде.
Келісімнің екінші кезеңінде Газаны басқару, қайта қалпына келтіру, халықаралық күштерді орналастыру, Израиль әскерін шығару және бірқатар саяси әрі қауіпсіздік мәселелерін реттеу көзделген.
Палестиналық топтар мен кепілгер елдердің өкілдері атысты тоқтату келісімінің екінші кезеңіне қатысты келіссөздерді кеше Каирде бастаған болатын.
