Сенегалдағы Израиль елшісі Юваль Вакс сейсенбі күні Дакар қаласындағы университет кампусынан кетуге мәжбүр болды. Әлеуметтік желілерде тараған бейнематериалдарға сәйкес, студенттер оған наразылық білдіріп, Палестинаға қолдау білдіретін ұран тастады.

Вакс халықаралық қатынастар тәжірибесіне арналған конференцияда сөз сөйлеу үшін елдің ең ірі және беделді жоғары оқу орны Шейх Анта Диоп университетіне (UCAD) шақырылған болатын.

Алайда ол келген кезде залдың сыртында жиналған ондаған студент “Палестинаға бостандық!”, “Газаны босатыңдар!” және “Израиль – соғыс қылмыскері!” деп ұрандатты.

Әлеуметтік желілерде тараған видеоларда студенттердің Палестина туын көтеріп, жаңа тағайындалған елшіні айқайлап қарсы алып, оның сөз сөйлеуіне кедергі келтіргені көрсетілген.

Ваксты қауіпсіздік қызметкерлері алып шықты. Ол аудиторияға сөз сөйлемей университеттен кетіп қалды. Наразылық білдірушілер болса ол кеткеннен кейін де ұрандарын жалғастырып, туларын көтеріп тұрды.

Вакс 8 мамыр күні Сенегал президенті Басиру Диомайе Файеге сенім грамотасын тапсырған болатын.