Қауіпсіздік саласындағы бір дереккөздің мәліметінше, сенбі күнінен бері Пәкістанның Белуджистан провинциясында террористер ұйымдастырған үйлестірілген шабуылда 250-ден астам адам қаза тапқан. Үкімет күштері шабуылдаушыларды іздестіруде, ал қақтығыстар әлі де жалғасуда.
Ауғанстан және Иранмен шекаралас, пайдалы қазбаларға бай бұл провинцияда Пәкістанның қауіпсіздік күштері ондаған жыл бойы жалғасып келе жатқан белудж көтерілісімен күресіп келеді. Аймақта шетелдіктерге, басқа өңірлерден келген пәкістандықтарға және қауіпсіздік күштеріне қарсы қарулы шабуылдар жиі жасалады.
Аты-жөні жарияланбаған жоғары лауазымды шенеунік сәрсенбі күні “AFP” агенттігіне берген мәлімдемесінде: «Жалғасып жатқан терроризмге қарсы операциялар барысында 197 террорист жойылды», – деді.
Оның айтуынша, Белуджистанда үйлестірілген шабуыл салдарынан кемінде 36 бейбіт тұрғын мен 22 қауіпсіздік қызметкері қаза тапқан.
«Жиіркенішті әрі қорқақ әрекет»
Белуджистан провинциясының бас министрі Сарфраз Бугти жексенбі күні Кветта қаласында өткен баспасөз мәслихатында шабуыл жасалған барлық аумақтың террористерден тазартылғанын мәлімдеді.
Провинциядағы ең белсенді қарулы сепаратистік топ саналатын Белудж азаттық армиясы “AFP” агенттігіне жолдаған мәлімдемесінде шабуылдар үшін жауапкершілікті өз мойнына алды.
АҚШ террористік ұйым ретінде таныған бұл топ қарулы шабуылдар мен жанкештілік жарылыстар арқылы әскери нысандарды ғана емес, сондай-ақ полиция мен азаматтық басқару өкілдерін де нысанаға алғанын айтты.
Белудж азаттық армиясы соңғы жылдары өңірде жұмыс істейтін басқа провинциялардан келген пәкістандықтарға және шетелдік энергетикалық компанияларға қарсы шабуылдарын күшейткен.
Өткен жылы террористер ішінде 450 жолаушысы бар пойызға шабуыл жасаған. Бұл оқиға екі күнге созылған қанды қоршауға ұласқан еді.
БҰҰ сейсенбі күні соңғы шабуылдарды «жиіркенішті әрі қорқақ әрекет» деп бағалады.
