Түркия президенті Режеп Тайып Ердоғанның жұбайы Емине Ердоған қазан айында қол жеткізілген атысты тоқтатуға қарамастан, Израиль шабуылдарына ұшырап отырған әрі Газадағы оқиғаларды әлемге жеткізіп жүрген журналист әйелдердің рөлін атап өтіп, оларды «парасат пен ержүректіліктің символы» деп сипаттады.
Ердоған сәрсенбі күні түрік әлеуметтік медиа платформасы «Nsosyal»-да жариялаған жазбасында, Газадағы геноцидті әлемге жеткізу үшін жанын шүберекке түйіп жүрген қаһарман журналист әйелдердің қаранғылықтың арасынан шындықты көрсете алғанын айтты.
Емине Ердоған: «Олардың әрбір жазбасы, әрбір сөзі, әрбір қадамы – зұлымдыққа қарсы ақиқаттың тынысы. Бүгін сол тынысты сақтау, олар қалдырған ізді болашаққа жеткізу ˗ борышымыз», - деді.
Ердоған бұл мәлімдемесін сейсенбі күні Анкарадағы Президент аппараты жанындағы Коммуникация басқармасында өткен «Геноцидке куәгер әйелдер: Газада медиа және тойтарыс» атты бағдарламадан кейін жариялады.
Шекарасыз журналистер ұйымы жыл сайынғы есебінде биыл әлем бойынша қаза тапқан 67 журналистің шамамен жартысының өліміне Израиль жауапты екенін, ал Газадағы Израиль күштері 29 палестиналық тілшіні өлтіргенін хабарлады.
Деректе Израиль күштері өлтірген журналистер санының әлемде қаза болған журналистердің 43 пайызына тең екені, сондықтан Израиль мемлекетінің «журналистердің қас жауы» атанғаны атап көрсетілген. Есептегі деректер 2024 жылдың желтоқсаннан басталған 12 айлық кезеңді қамтиды.
Шекарасыз журналистер ұйымының деректеріне сәйкес, Израиль 2024 жылдың 7 қазанынан бері шамамен 220 журналисті өлтірген. Осылайша Израиль үш жыл қатарынан әлемде ең көп журналист өлтірген мемлекет болып отыр.
