Америкалық шенеуніктің «Reuters» агенттігіне берген мәліметіне қарағанда, АҚШ мемлекеттік хатшысы Марко Рубио Израиль мен Ливан арасындағы дипломатиялық келіссөздер аясында Ливан президенті Жозеф Аун және Беньямин Нетаньяхумен сөйлескен. Әңгіме барысында Рубио шиеленісті кезең-кезеңімен бәсеңдетуге мүмкіндік беретін жоспар ұсынған.
Шенеуніктің айтуынша, АҚШ алғашқы қадам ретінде Хезболланың Израильге қарсы шабуылдарын тоқтатуын, ал оған жауап ретінде Израильдің Бейруттағы жағдайды ушықтыратын әрекеттерден бас тартуын ұсынған.
«Бұл шиеленісті біртіндеп бәсеңдетуге және қақтығыстарды тиімді түрде тоқтатуға мүмкіндік береді», – деді америкалық шенеунік.
Алдымен Израиль шабуылдарын тоқтатады
Шенеунік сондай-ақ Жозеф Аунның ұсынысты ілгерілетіп, келісімге қол жеткізуге күш салып жатқанын айтты.
Хезболланың бітім шарттарын сақтайтынына кепілдік бергенін мәлімдеген Ливан парламентінің төрағасы Набих Берри атысты тоқтатудың жауапкершілігін Израильге жүктеді.
Нетаньяху жексенбі күні алты аптадан астам уақыт бұрын жарияланған бітімге қарамастан, армияға Хезболлаға қарсы операцияларды жалғастырып, Ливан аумағына тереңірек ену туралы бұйрық бергенін мәлімдеген болатын.
Әскери дереккөздердің хабарлауынша, соңғы операция барысында Израиль әскері 900 жылдық Бофор қамалын және Ливанның оңтүстігіндегі стратегиялық маңызы бар аймақты бақылауға алған.
АҚШ өкілі: «АҚШ Израильдің Хезболла тарапынан бейбіт тұрғындарға жасалып жатқан шабуылдарға үнсіз шыдап отыруын құптамайды», - деп мәлімдеді.
Израильдің 2 наурыздан бері жалғасып келе жатқан шабуылдарынан 1,2 миллионнан астам ливандық өз үйлерін тастап кетуге мәжбүр болды.
Сол уақыттан бері Израиль Ливанның оңтүстігін, шығысын және астанасы Бейрутты нысанаға алды. Ливан Денсаулық сақтау министрлігінің мәліметіне сәйкес, қаза тапқандар саны 3 200-ден асты. Ал Израиль осы кезеңде 23 әскері мен төрт бейбіт тұрғынның қаза тапқанын хабарлады.
