Газаның Денсаулық сақтау министрлігі соңғы 24 сағат ішінде аштықтан тағы үш палестиналықтың қайтыс болғанын хабарлады.

Министрлік жұма күні жасаған мәлімдемесінде: «Ауруханалар соңғы 24 сағат ішінде Газа секторында аштық пен дұрыс тамақтанбаудың салдарынан үш өлім жағдайын тіркеді», – деді.

Осылайша 2023 жылдың қазан айынан бері аштықтан қайтыс болғандар саны 162-ге жетті, оның 92-сі бала.

Өткен апта БҰҰ-ның Дүниежүзілік азық-түлік бағдарламасы Газа тұрғындарының үштен бірі Израиль блокадасының салдарынан бірнеше күн бойы азық-түліксіз қалғанын ескертті.

Дүниежүзілік азық-түлік бағдарламасының есебі бойынша, Газадағы әрбір төртінші палестиналық ашаршылыққа тап болған. 100 000 әйел мен бала дұрыс тамақтанбау салдарынан зардап шегуде.

Израиль Газа секторын 18 жылдан бері қоршауда. 2 наурыздан бастап гуманитарлық көмекке тосқауыл қойып, аймақтағы ауыр жағдайды одан сайын ушықтырды. Барлық шекара бекеттерін жауып тастады.

Палестина билік өкілдері аймақтағы 2,4 миллион тұрғынының қажеттіліктерін өтеу үшін күніне кемінде 600 гуманитарлық жүк көлігі қажет екенін айтты.

Израиль армиясы 2023 жылдың 7 қазанынан бері Газаға қарсы аяусыз шабуыл жасап, 60 300-ден астам палестиналықты өлтірді. Толассыз әуе соққылары Газаны күл-талқан етіп, азық-түлік дағдарысына ұшыратты.