Жергілікті билік өкілдерінің мәліметінше, Нигерияның солтүстігіндегі Кано штатында болған жол-көлік апатынан кемінде 30 адам қаза тапты.

Кано штатының баспасөз хатшысы жексенбі күні жасаған мәлімдемесінде
«Жол апаты Гуджунгу бағытына бара жатқан жүк көлігінің абайсыз жүргізілуі салдарынан болды. Апат 30-дан астам адамның қаза табуына және көптеген адамның ауыр жарақат алуына себеп болды», -  деді.

Кано штатының губернаторы Абба Кабир Юсуф аман қалғандарға тегін медициналық көмек көрсетуді тапсырды.

Нашар жолдар мен жол қозғалысы ережелерінің бұзылуы салдарынан Нигерияда жол апаттары жиі болады.

2023 жылы елдің Федералдық жол қауіпсіздігі корпусы Нигерияда 9 570 жол апаты тіркеліп,  салдарынан 5 421 адамның қаза тапқанын хабарлаған.