Сыртқы істер министрі Хакан Фидан Катарға сапары барысында Катар телеарнасына сұхбат берді.
Катар мен Түркияның тарихи әрі берік қарым-қатынасқа ие екі ел екеніне назар аударған Фидан екі ел арасындағы стратегиялық әріптестіктің негізі марқұм Катар Әмірі Шейх Хамад бин Халифа Әл Санидің тұсында қаланғанын атап өтті.
Хакан Фидан: «Біз бүгінде Ливаннан Ауғанстанға, Ауғанстаннан Суданға, Суданнан Газаға, Палестина мәселесі мен Иран мәселесіне дейінгі көптеген тақырыпта Түркия-Катар ынтымақтастығының көрсеткен озық үлгісі аймақтағы басқалар тарапынан да жоғары бағаланып, үлгі ретінде қабылданып жатқанын көріп отырмыз. Шын мәнінде, аймақта бәсекелестіктің орнына әрдайым айтып жүргеніміздей, сындарлы ынтымақтастық қажет. Катар да осы бағытта өте үлкен күш-жігер жұмсауда», — деді.
Парсы шығанағы аймағында Катарды қоса алғанда, Сауд Арабиясы, Біріккен Араб Әмірліктері (БАӘ), Кувейт және Оманның жылдар бойы өте маңызды ілгерілеушілікке қол жеткізгеніне тоқталған Фидан бұл елдердің даму мен негізгі қызметтерді жетілдіру арқылы әлемдік стандарттарға сай өте қуатты мемлекет пен қалалар қалыптастырғанын білдірді.
Хақан Фидан 28 ақпаннан бері жалғасып жатқан АҚШ-Иран соғысының аймақ экономикасына әсер еткенін айтып, бұл соғыстың кең етек жаю қаупі аймақта бұдан да үлкен проблемаларға тудыруы мүмкін екенін атап өтті.
Қазіргі уақытта инфрақұрылымдарға шабуыл жасалып жатқанын еске салған Фидан: «Біздің тілегіміз — Иран мен Америка арасындағы келісімге тезірек қайта оралу. Өздеріңіз білетіндей, Пәкістанның араағайындығымен, Катардың белсенді үлесімен және Түркияның да қолдауымен өзара түсіністік меморандумы әзірленген болатын. Бірақ кейіннен қазір бұл нәтижеден алыстап кеттік. Осыған қайта оралу керек», — деп баса айтты.
Сыртқы істер министрі Катарға сапары барысындағы кездесулерде осы мәселелерді талқылағандарын тілге тиек етіп, былай деді:
«Катардың бұл дағдарысты шешу үшін барлық сындарлы әдісті, барлық арнаны қолдана отырып, қолынан келгеннің бәрін жасауға тырысып жатқанын ризашылықпен көріп отырмын. Жақында жақсы жаңалық естиміз деп үміттенемін. Түркия да бұл мәселеде Катармен тығыз үйлесімділікте жұмыс істеуде. Катардың қауіпсіздігі де, Катардың бейбітшілігі де, аймақтың қауіпсіздігі мен тұрақтылығы да Түркияның мүддесіне сай келеді. Сондықтан көптеген мәселелердегідей, бұл істе де Парсы шығанағы аймағымен және басқа да ислам әлемі елдерімен бірлесіп жұмыс істеуді жалғастырамыз».
